އައްޑޫ ޕޮލިސް ކޮލެޖްގެ ގިނަ އަދަދެއްގެ ދަރިވަރުންތަކެއް ރޭ ކާނާ ވިހަވި ގޮތް ކަމާބެހޭ އިދާރާތަކާ ގުޅިގެން ބަލަމުން އަންނަ ކަމަށް ފުލުހުން ބުނެފި އެވެ.
ފުލުހުން މިއަދު ނެރުނު ބަޔާނެއްގައި ބުނީ އެ ހާދިސާގައި ޖުމްލަ 32 ދަރިވަރަކު ހޮސްޕިޓަލުގައި އެޑްމިޓްކުރަން ޖެހުނު ކަމަށާއި އޭގެ ތެރެއިން ފަސް ދަރިވަރަކަށް އައިސީޔޫގައި ފަރުވާދޭން ޖެހުނު ކަމަށެވެ. އަދި މިހާރު އައިސީޔޫގައި ފަރުވާދެމުން އަންނަ ދެ ދަރިވަރުންގެ ހާލު ވެސް ރަނގަޅުވަމުން އަންނަ ކަމަށް ފުލުހުން ބުންޏެވެ.
"މި ހާދިސާ ހިނގި ގޮތް ކަމާބެހޭ އިދާރާތަކާ ގުޅިގެން މި ގެންދަނީ ބަލަމުން. އަދި މިފަދަ ކަމެއް ތަކުރާރު ވިޔަ ނުދިނުމަށް އަޅަންޖެހޭ ފިޔަވަޅުތައް އަޅަމުންދާ ވާހަކަ ދަންނަވަން." ފުލުހުން ބުންޏެެވެ.
ފުލުހުންގެ ބަޔާނުގައި ވަނީ ދަރިވަރުންތަކެއް ކާނާ ވިހަވެގެން ފަރުވާދޭން ޖެހުނު ހާދިސާގައި އެހީތެރިކަން ފޯރުކޮށް ދިން ފަރާތްތަކަށް ޝުކުރު ވެސް އަދާކޮށްފަ އެެވެ.
އެގޮތުން އައްޑޫގެ އެކި މުއައްސަސާތަކާއި އެހެނިހެން ފަރާތްތަކުން އެހީތެރިކަން ފޯރުކޮށް ދީފައިވާ ކަމަށް ބުންޏެވެ.
"ހާއްސަކޮށް އައްޑޫ ސިޓީ އިކުއެޓޯރިއަލް ހޮސްޕިޓަލުގެ ވެރިންނާއި މުވައްޒަފުން، ސަދަން ރީޖަންގެ ސިފައިން، ދާޚިލީ ވުޒާރާ، އައްޑޫ ސިޓީ ކައުންސިލު، ރެޑް ކްރެސެންޓު، ޕަބްލިކް ހެލްތު، ނޭޝަނަލް ކެޑޭޓް ކޯޕްސް، އައްޑޫ ސިޓީ އަވަށު އޮފީސްތަކާއި ހެލްތު ސެންޓަރުތަކުގެ އިތުރުން އެ ސިޓީގެ ވޮލަންޓިއަރުންގެ އެހީތެރިކަން ފާހަގަކުރަން." ފުލުހުން ބުންޏެވެ.