ފ. މަގޫދޫ އެއާޕޯޓުގެ މަސައްކަތް ހުއްޓިފައި އޮންނަތާ ދުވަސްތަކެއް ފަހުން އެ މަޝްރޫއުގެ މަސައްކަތް އަލުން ފަށައިފި އެވެ.
އެމްޑީޕީ ސަރުކާރުން މަގޫދޫ އެއާޕޯޓުގެ މަސައްކަތް އެމްޓީސީސީއާ ހަވާލުކުރީ މި އަހަރުގެ އެޕްރީލަށް ނިންމާ ގޮތަށް 231.54 މިލިއަން ރުފިޔާއަށެވެ. އެމްޓީސީސީއާ މަޝްރޫއު ހަވާލުކުރީ 2022 ގެ އޮކްޓޯބަރު މަހު އެވެ.
އެ އެއާޕޯޓު ހިންގަން ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރްއޭސީއެލް) އާ ހަވާލުކުރަން ނިންމީ މިދިޔަ އަހަރުގެ ނޮވެމްބަރު މަހުގެ މެދުތެރޭގަ އެވެ.
މަގޫދޫ އެއާޕޯޓްގެ މަސައްކަތް މަޑުޖެހުނީ މި އަހަރުގެ ކުރީކޮޅު ބޭއްވި މަޖިލިސް އިންތިހާބުގެ ކެމްޕޭން ތެރޭގައި ނިލަންދޫގައި އާ އެއާޕޯޓެއް އަޅަން މި ސަރުކާރުން ނިންމުމާ ގުޅިގެންނެނެވެ. އެކަމާ ހެދި އެ ރަށުގައި މުޒާހާރާ ވެސް ކުރި އެވެ.
މަގޫދޫ ކައުންސިލުން މިހާރު އެއާޕޯޓްގެ މަސައްކަތްތައް އަލުން ކުރިއަށްދާ ކަމަށެވެ. އެގޮތުން މިހާރު ރަންވޭގައި ތާރު އެޅުން ވެސް ކުރިއަށްދާ ކަމަށް ކައުންސިލުން ބުންޏެވެ.