ކާނާ ވިހަވެގެން ބޮލީވުޑްގެ ޒުވާން ބަތަލާ ޖާންވީ ކަޕޫރް މިއަދު ހޮސްޕިޓަލްގައި އެޑްމިޓްކޮށްފި އެވެ.
މީޑިއާތަކުން ބުނީ 27 އަހަރުގެ ބަތަލާ އެޑްމިޓްކޮށް ފަރުވާ ދެމުން އަންނަ އިރު، ދޫކޮށްލާނެ ކަމަށް ބެލެވެނީ މާދަމާ ކަމަށެވެ. ޖާންވީ އެޑްމިޓްކޮށްފައި މި ވަނީ އަންނަ މަހުގެ 2 ގައި ރިލީޒްކުރަން ހަމަޖެހިފައިވާ އޭނަގެ އާ ފިލްމު "އުލާޖް" ޕްރޮމޯޓްކުރުމުގެ މަސައްކަތުގައި ބިޒީކޮށް އުޅެނިކޮށެވެ.
ޖާންވީ އަކީ ކުރީގެ މަޝްހޫރު ބަތަލާ ސްރީދޭވީގެ ދެ ކުދިންގެ ތެރެއިން ދޮށީ ދަރިފުޅެވެ.
ކުރިއަރަމުން އަންނަ ބަތަލާގެ މި އަހަރުގެ ފުރަތަމަ ފިލްމަކީ މެއިގައި ރިލީޒްކުރި "މިސްޓަ އެންޑް މިސިޒް މާހީ" އެވެ. މި އަހަރުގެ ސެޕްޓެމްބަރުގައި ޖާންވީގެ ފުރަތަމަ ތެލެގޫ ފިލްމު "ދެވާރާ: ޕާޓް 1" ވެސް ރިލީޒްކުރާނެ އެވެ.