ޓޫރިޒަމްގެ ދާއިރާ އިން ލިބޭ އާމްދަނީއެއް ވަކި އިންސައްތައެއް ކައުންސިލްތަކުގެ ބަޖެޓަށް ޖަމާކުރަން މާ ލަސްތަކެއް ނުވެ ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ނާރެސް ޕޯޓަލް އިފްތިތާހު ކުރުމާއި ކުރަނގި އޮޕަރޭޝަން ފޭސް 2 އިފްތިތާހު ކުރުމަށް ރޭ ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ކައުންސިލްތައް ބާރުވެރި ކުރުވުމަކީ ސަރުކާރުގެ ވަރަށް މުހިއްމު ސިޔާސަތެއް ކަމަށާއި އެ ބާރުވެރިކަން ނުދޭނަމަ ކައުންސިލްތަކަށް ރައްޔިތުންނަށް އެންމެ ރަނގަޅަށް ހިދުމަތްތައް ނުދެވޭނެ ކަމަށެވެ.
ރައްޔިތުންނާ ގުޅޭ އެފަދަ މުހިއްމު ހިދުމަތްތައް ދޭން ސަރުކާރުން މަގުފަހިކޮށްދޭނެ ކަމަށާއި އެއީ އިޖްތިމާޢީ ގޮތުންވިއަސް އަދި އިޤްތިޞާދީ ގޮތުން ވިޔަސް އެކަން ކަމުގައި ބާރުވެރިކަން ސަރުކާރުން ދޭނެ ކަމަށް ރައީސް ވިދާޅުވި އެވެ.
"އަޅުގަނޑު އިޢުލާންކޮށްފައިވާ ގޮތަށް ޤާނޫނުތަކަށް ގެންނަންޖެހޭ ބަދަލާއި މިކަންކަން ކުރުމާއި އެކީގައި ރާއްޖެއަށް ޓޫރިޒަމްގެ ދާއިރާއިން މިލިބޭ އާމްދަނީގެ ވަކި އިންސައްތައެއް ކައުންސިލްތަކުގެ ބަޖެޓަށް ޖަމާވާގޮތައް އެނިންމި ނިންމުންވެސް އިރާދަކުރެއްވިއްޔާ މާލަސްތަކެއް ނުވެ އަޅުގަނޑުމެން ތަންފީޒުކުރަން ފަށާނަން،" ރައީސް ވިދާޅުވި އެވެ.
މީގެއިތުރުން މިހާރު އިޢުލާންކޮށް އަމަލުކުރާ ޤަވާއިދުގެ ތެރެއިން އެކި ފަޅުރަށްތައް ހޯދައިގެން މެދު ރާސްތާގެ ތެރެއިން އާމްދަނީ ހޯދުމުގެ ފުރުސަތު ވެސް ކައުންސިލްތަކަށް ހުޅުވާލާފައިވާ ކަމަށާއި ގާނޫނީ އިމުގެ ތެރެއިން ފަޅުރަށްތައް އިހުތިސާސްގެ ތެރޭގައި ހިމެނުމަށް ފުރުސަތު ދެމުންދާ ކަމަށް ރައީސް ވިދާޅުވި އެވެ.
"ބޭނުން ވަނީ އެންމެ ފުރިހަމައަށް ކައުންސިލްތަކަށް ފުރުސަތު ދޭން. ނަމަވެސް ރައްޔިތުންނަށް ޚިދުމަތް ދިނުމުގައި އެންމެ އެކަށީގެންވާ ގޮތަކަށް ބައްޓަން ކުރަން ޖެހޭ މި ނިޒާމް. ކައުންސިލްތައް އެކުލަވާލުމުގައި ގެންނަން ޖެހޭ ބަދަލުތައް އަޅުގަނޑު ވާނީ ދަންނަވާފައި،" ރައީސް ވިދާޅުވި އެވެ.