ރައީސް ޑރ. މުހައްމަދު މުއިއްޒު މިއަދު ވެރިކަމުގައި ހުންނެވުމަކީ ލާމަރުކަޒީ ނިޒާމަށް ލިބުނު ނަސީބެއް ކަމަށް ލޯކަލް ގަވަމެންޓް މިނިސްޓަރު އާދަމް ޝަރީފު އުމަރު ވިދާޅުވެއްޖެ އެވެ.
ނާރެސް ޕޯޓަލް އިފްތިތާހު ކުރުމާއި ކުރަނގި އޮޕަރޭޝަން ފޭސް 2 އިފްތިތާހު ކުރުމަށް ރޭ ބޭއްވި ޖަލްސާގައި އާދަމް ވިދާޅުވީ ރައީސް މުއިއްޒުގެ ޒައާމަތުގައި މިހާރުވެސް ވަރަށް މުހިއްމު ހެޔޮ ބަދަލުތަކެއް ލާމަރުކަޒީ ނިޒާމަށް ގެނެސްފައިވާ ކަމަށާއި އެމަނިކުފާނު ވެރިކަމާ ހަވާލުވެވަޑައިގެންނެވިއިރު ކައުންސިލްތައް ތިބީ ހަތަރުވަނަ ދަރަޖައިގައި ކަމަށެވެ. ނަމަވެސް މިއަދު ކައުންސިލްތަކުގެ ދަރަޖަ ތިނަކަށް ބަދަލުކުރެވިފައިވާ ކަމަށް ވިދާޅުވި އެވެ.
"ރާއްޖޭގެ ކައުންސިލްތަކާ ވަރަށް ބޮޑަށް ގުޅިވަޑައިގެން ވަޒީރުކަން ކުރެއްވި ބޭފުޅަކު، ރައްޔިތުންނާ އަދި ސަރުކާރާ ގުޅިގެން މަސައްކަތް ކުރެއްވި މޭޔަރަކު މިއަދު ރާއްޖޭގެ ރައީސުލްޖުމްހޫރިއްޔާ ކަމުގެ މަގާމުގައި ހުންނެވުމަކީ ރާއްޖޭގެ ލާމަރުކަޒީ ނިޒާމަށް ލިބިފައިވާ ނަސީބެއް،" އާދަމް ވިދާޅުވި އެވެ.
ރައީސް މުއިއްޒުގެ ޒައާމަތުގައި ކައުންސިލްތައް ބާރުވެރިކުރުވައި، އެތަންތަނަކީ މާލީ ގޮތުން ހަރުދަނާ ތަންތަނުގެ ގޮތުގައި ހެދުމަށް ކުރާ މަސައްކަތުގެ ނަތީޖާއެއްގެ ގޮތުން ލާމަރުކަޒީ ނިޒާމުގެ ޗެމްޕިއަނަކަށް ރައީސް މުއިއްޒު ވެވަޑައިގަންނަވާނެ ކަމަށްވެސް އާދަމް ވިދާޅުވި އެވެ.
ރޭގެ ޖަލްސާގައި ރައީސް މުއިއްޒު ވަނީ ޓޫރިޒަމްގެ ދާއިރާ އިން ލިބޭ އާމްދަނީއެއް ވަކި އިންސައްތައެއް ކައުންސިލްތަކުގެ ބަޖެޓަށް ޖަމާކުރަން މާ ލަސްތަކެއް ނުވެ ފަށާނެކަން އިއުލާންކުރައްވާފަ އެވެ. ކައުންސިލްތައް ބާރުވެރި ކުރުވުމަކީ ސަރުކާރުގެ ވަރަށް މުހިއްމު ސިޔާސަތެއް ކަމަށާއި އެ ބާރުވެރިކަން ނުދޭނަމަ ކައުންސިލްތަކަށް ރައްޔިތުންނަށް އެންމެ ރަނގަޅަށް ހިދުމަތްތައް ނުދެވޭނެ ކަމަށްވެސް ރައީސް ވިދާޅުވި އެވެ.