އެމެރިކާ އަސްކަރިއްޔާ އާއި އެމްއެންޑީއެފ ގުޅިގެން ހިންގި "އެކްސަސައިޒް ބެލެންސް ފްލޭޝް މެޓަލް" ތަމްރީނު،ކާމިޔާބުކަމާ އެކު ނިންމާލައިފި އެވެ.
އެ ޓްރެއިނިން ނިންމައިލުން ފާހަގަކުރަން އެމްއެންޑީއެފް ސެންޓްރަލް އޭރިއާ ކޮމާންޑް ހެޑްކުއޯޓަރޒް، ލ.ކައްދޫގައި އިއްޔެ ބޭއްވި ރަސްމިއްޔާތު ޝަރަފުވެރިކޮށް ދެއްވީ، އެމެރިކާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ހިޒް އެކްސެލެންސީ ހުގޯ ޔޮން އެވެ.
އެމެރިކާގެ އަސްކަރިއްޔާއާ ގުޅިގެން އެމްއެންޑީއެފުން ކުރިއަށް ގެންދިޔަ ތަމްރީނުތައް ކުރިިއަށް ދިޔައީ މިދިޔަ މަހުގެ 25 އިން ފެށިގެން އިއްޔެގެ ނިޔަލަށް، ލ. އަތޮޅުގެ އެއްގަމާއި ކަނޑުގެ ސަރަހައްދުތަކުގައެވެ. މި ތަމްރީނުތަކުގައި، އެމްއެންޑީއެފް ކޯސްޓްގާޑުގެ ސިފައިންނާއި، އެމްއެންޑީއެފް ސްޕެޝަލް ފޯސަސްގެ މެންބަރުންނާއި އެމްއެންޑީއެފް މެރިން ކޯގެ މެރީންސް ބައިވެރިވި އެވެ.
އެމްއެންޑީއެފްގެ ޤާބިލުކަން އިތުރުކުރުމުގެ ގޮތުން، އެމެރިކާ އަސްކަރިއްޔާއާ ގުޅިގެން ސިލްސިލާކޮށް ބާއްވަމުން އަންނަ ތަމްރީނުތަކުގެ ތެރެއިން ކުރިއަށް ގެންދިޔަ މި ތަމްރީނުގައި، މުދައްރިބުންގެ ގޮތުގައި އެމެރިކާ އަސްކަރިއްޔާގެ ސިފައިން ހަރަކާތްތެރިވެފައިވެ އެވެ.
"އެކްސަސައިޒް ބެލެންސް ފްލޭޝް މެޓަލް" ނިންމުމުގެ ގޮތުން ބޭއްވި ރަސްމިއްޔާތުގައި އެމްއެންޑީއެފް ސެންޓްރަލް އޭރިއާ ކޮމާންޑްގެ ކޮމާންޑަރު ކާނަލް އަޙްމަދު ފާތިޙާއި އެކްސަސައިޒުގެ މުދައްރިބުން ބައިވެރިވި އެވެ.