މިއަދު ބޭއްވި ބައި-އިލެކްޝަންތަކުގެ ވޯޓުލާން ނިކުމެފައިވަނީ އެންމެ 26 ޕަސެންޓް މީހުން ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.
މިއަދު ކުރިއަށް ދިޔައީ މާލޭ ސިޓީ ކައުންސިލުގެ ހުސްވެފައިވާ ތިން ގޮޮނޑިއަށް ކައުންސިލަރުން އިންތިޚާބުކުރުމަށް ބޭއްވި ބައި އިލެކްޝަނާއި ފ. ބިލެތްދޫ ކައުންސިލްގެ ރައީސާއި، ކުޅުދުއްފުށި ސިޓީ ކައުންސިލްގެ ކުޅުދުއްފުށި އުތުރު ދާއިރާ ކައުންސިލް މެންބަރު އަދި ރ. ރަސްމާދޫ ކައުންސިލްގެ އަންހެން މެންބަރު ހޮވަން ބޭއްވި ބައި-އިލެކްޝަނެވެ.
މި ހަތަރު ބައި އިލެކްޝަންގައި ވޯޓުލުމުގެ ހައްގު 13،112 މީހުންނަށް ލިބެ އެވެ.
އިލެކްޝަންސް ކޮމިޝަނުން ބުނީ ވޯޓުލުމުގެ ވަގުތު 4 ޖެހިއިރު ހަމަވިއިރު، ވޯޓުލާފައިވަނީ 3،528 މީހުން ކަމަށެވެ. އެއީ ވޯޓުލުމުގެ ހައްގު ލިބިފައިވާ މީހުންގެ 26.91 ޕަސެންޓެވެ. ވޯޓުނުލާ 9،584 މީހުން ތިބި ކަމަށް އީސީން ބުނެ އެވެ.
މާލޭ ސިޓީ ކައުންސިލްގެ ގޮނޑިތައް ހުސްވީ އެ ދާއިރާތަކުގެ ކައުންސިލަރު ކަމުގައި ތިއްބެވި ބޭފުޅުން، ވިހިވަނަ ރައްޔިތުންގެ މަޖިލީހުގެ މެންބަރު ކަމަށް އިންތިހާބުވުމާ ގުޅިގެންނެވެ.
ޤާނޫނުގައިވާ ގޮތުން ކައުންސިލްގެ ގޮނޑިއެއް ހުސްވާތާ 60 ދުވަހުގެ ތެރޭގައި ބައި-އިލެކްޝަނެއް ބާއްވަން ޖެހެ އެވެ.