ވިދައި ގުގުރުމާ ގުޅޭ ހާދިސާތައް ވަގުތުން ދެނެގަނެ، މައުލޫމާތު ލިބޭ ސިސްޓަމެއް ބަހައްޓައިފި އެވެ.
މިކަމާ ގުޅޭ ގޮތުން އެންވަޔަރްމަންޓް މިނިސްޓްރީން މިއަދި ބުނީ ރާއްޖޭގައި ފުރަތަމަ ފަހަރަށް ލައިޓްނިން ޑިޓެކްޝަން ސިސްޓަމެއް ބެހެއްޓީ ރާއްޖޭގެ މޫސުމާ ބެހޭ އިދާރާ އާއި ޗައިނީސް އެކަޑެމީ އޮފް ސައިންސްގެ ދަށުން ހިންގަމުން އަންނަ އިންސްޓިޓިއުޓް އޮފް އިލެކްޓްރިކަލް އިންޖީނިއަރިންނާ ގުޅިގެން ކަމަށެވެ.
އެ ހިދުމަތް ފެށުމަށް ވެލާނާ އިންޓަނޭޝަނަލް އެއާޕޯޓް (ވީއައިއޭ) އާއި ގަން އިންޓަނޭޝަނަލް އެއާޕޯޓުގައި ވަނީ ލޯންގް-ރޭންޖު ލައިޓްނިން ޑިޓެކްޝަން ސާމާނު ހަރުކޮށްފަ އެވެ.
މިނިސްޓްރީން ބުނި ގޮތުގައި މި ސިސްޓަމް ސަރަހައްދީ ވިއުގައާ ގުޅާލުމުން ރާއްޖެ އާއި ރާއްޖެ ވަށައިގެންވާ ސަރަހައްދަށް އަންނަ ވިދައި، ގުގުރުމުގެ ހާދިސާތައް ވަގުތުން ވަގުތަށް ދެނެގަނެވޭނެ އެވެ. އަދި މިކަން އިތުރަށް ފުރިހަމަކުރުމަށްޓަކައި ޝޯޓް-ރޭންޖު ލައިޓްނިން ޑިޓެކްޝަން ސާމާނު ހަރުކުރުމުގެ މަސައްކަތް ވެސް ކުރިއަށްގެން ދާނެ ކަމަށް މިނިސްޓްރީން ބުންޏެވެ.
މި ސިސްޓަމް އެއްކޮށް ގާއިމްކޮށް ނިމުމުން، ވިދާ، ގުގުރުމުގެ އެކި މަރުހަލާތައް ތަފާތުކޮށް ވަގުތުން ބަލާލެވޭނެ ކަމަށާއި އޭގެ އިތުރުން ވިދުވަރާ ގުޅިފައިވާ ކޮޅިގަނޑު ދަތުރުކުރާ މިސްރާބު ދެނެގަނެވި، ކުރިއަށް ލަފާކުރުމާއި ދުރާލާ ދެވޭ އިންޒާރުގެ ސައްހަކަން އިތުރުވެގެންދާނެ އެވެ.