މިއަދު ބޭއްވި ހަ ދާއިރާއެއްގެ ބައި އިލެކްޝަންގެ ތެރެއިން ވެރިކަން ކުރާ ޕީއެންސީން ފަސް ގޮނޑި ކާމިޔާބު ކުރިއިރު، އިދިކޮޅު އެމްޑީޕީ އަށް އެންމެ ގޮނޑިއެއް ވެސް ކާމިޔާބު ނުކުރެވި ނާކާމިޔާބީއާ ކުރިމަތިލާން ޖެހިއްޖެ އެވެ.
މިއަދު ކުރިއަށް ދިޔައީ މާލޭ ސިޓީ ކައުންސިލުގެ ހުސްވެފައިވާ ތިން ގޮޮނޑިއަށް ކައުންސިލަރުން އިންތިޚާބުކުރުމަށް ބޭއްވި ބައި އިލެކްޝަނާއި ފ. ބިލެތްދޫ ކައުންސިލްގެ ރައީސާއި، ކުޅުދުއްފުށި ސިޓީ ކައުންސިލްގެ ކުޅުދުއްފުށި އުތުރު ދާއިރާ ކައުންސިލް މެންބަރު އަދި ރ. ރަސްމާދޫ ކައުންސިލްގެ އަންހެން މެންބަރު ހޮވަން ބޭއްވި ބައި-އިލެކްޝަނެވެ.
މީގެތެރެއިން ޕީއެންސީން ވަނީ މާލޭ ސިޓީ ކައުންސިލްގެ ތިން ގޮނޑި އާއި ކުޅުދުއްފުށި އުތުރު ދާއިރާގެ ކައުންސިލް ގޮނޑީގެ އިތުރުން ބިލެތްދޫ ކައުންސިލްގެ ރައީސްގެ ގޮނޑި ކާމިޔާބުކޮށްފަ އެވެ. ރަސްމާދޫ ކައުންސިލްގެ އަންހެން މެންބަރު ހޮވަން ބޭއްވި ބައި އިލެކްޝަން ކާމިޔާބު ކުރީ މިނިވަން ކެންޑިޑޭޓެކެވެ.
މި ހަތަރު ބައި އިލެކްޝަންގައި ވޯޓުލުމުގެ ހައްގު 13،112 މީހުންނަށް ލިބެ އެވެ.
އިލެކްޝަންސް ކޮމިޝަނުން ބުނީ ވޯޓުލުމުގެ ވަގުތު 4 ޖެހިއިރު ހަމަވިއިރު، ވޯޓުލާފައިވަނީ 3،528 މީހުން ކަމަށެވެ. އެއީ ވޯޓުލުމުގެ ހައްގު ލިބިފައިވާ މީހުންގެ 26.91 ޕަސެންޓެވެ. ވޯޓުނުލާ 9،584 މީހުން ތިބި ކަމަށް އީސީން ބުނެ އެވެ.
ޤާނޫނުގައިވާ ގޮތުން ކައުންސިލްގެ ގޮނޑިއެއް ހުސްވާތާ 60 ދުވަހުގެ ތެރޭގައި ބައި-އިލެކްޝަނެއް ބާއްވަން ޖެހެ އެވެ.