މާޔޫސް ނުވޭ، ކުރިއަށް އޮތީ ކާމިޔާބު ދުވަސްތަކެއް

އިއްޔެ ބޭއްވި ކައުންސިލްތަކުގެ ބައި އިލެކްޝަންތަކުން ނާކާމިޔާބުވި ނަމަވެސް އެމްޑީޕީގެ އާންމު މެމްބަރުން މާޔޫސް ނުވުމަށް އެ ޕާޓީގެ ޗެއާޕާސަން ފައްޔާޒު އިސްމާއިލް ގޮވާލައިފި އެވެ.

އިއްޔެ ބޭއްވި ހަ ދާއިރާއެއްގެ ބައި އިލެކްޝަންގެ ތެރެއިން ވެރިކަން ކުރާ ޕީއެންސީން ވަނީ ފަސް ގޮނޑި ކާމިޔާބުކޮށްފަ އެވެ. އެމްޑީޕީ އަށް މި ބައި އިލެކްޝަންތަކުން އެންމެ ގޮނޑިއެއް ވެސް ކާމިޔާބު ކުރެވިފައެއް ނުވެ އެވެ.

ފައްޔާޒު ވިދާޅުވީ މަދު އަދަދެއްގެ ބަޔަކު ވޯޓުލީ އިންތިހާބުގެ ނަތީޖާ ނިކުތް ގޮތާއި މެދު މާޔޫސްވާންވީ ސަބަބެއް ނެތް ކަމަށާއި ޕާޓީގެ ހިންގުން ހަރުދަނާކުރުމަށް މިހާރު ކުރެވޭ މަސައްކަތްތަކުގެ ތެރެއިން އެމްޑީޕީ އަށް ކުރިއަށް އޮތީ ކާމިޔާބު ދުވަސްތަކެއް ކަމަށެވެ.

މި ބައި އިލެކްޝަންތަކުގައި ވޯޓުލުމުގެ ހައްގު 13،112 މީހުންނަށް ލިބެ އެވެ. ނަމަވެސް ވޯޓުލުމުގެ ވަގުތު ހަމަވިއިރު ވޯޓުލާން ނިކުމެފައިވަނީ 3،528 މީހުންނެވެ. އެއީ ވޯޓުލުމުގެ ހައްގު ލިބިފައިވާ މީހުންގެ 26.91 ޕަސެންޓެވެ. ވޯޓުނުލާ 9،584 މީހުން ތިބި ކަމަށް އީސީން ބުނެ އެވެ.