މީގެ ކުރިން ވަރަށް ބޮޑު މަގްބޫލުކަމެއް ހޯދި އޮފީސްތަކުގެ ޓެލެޑްރާމާ މުބާރާތް އަހަރުތަކަކަށް ފަހު އަނެއްކާވެސް ކުރިއަށް ގެންދަން ނިންމައި ނެޝަނަލް ސެންޓަ ފޯ ދި އާޓްސް (އެންސީއޭ) އިން އެ މުބާރާތުގައި ބައިވެރިވުމުގެ ފުރުސަތު އަންނަ ބުރާސްފަތިދުވަހުގެ ނިޔަލަށް ހުޅުވާލައިފިއެވެ.
އެއް ލައްކަ ރުފިޔާގެ އަގުހުރި މި މުބާރާތުގައި ކުރިން ފުރުސަތު ދިނީ ހަމައެކަނި ސަރުކާރުގެ އޮފީސްތަކަށް ނަމަވެސް މި އަހަރު އަމިއްލަ އޮފީސްތަކަށް ވެސް ބައިވެރިވުމުގެ ފުރުސަތު ހުޅުވާލާފައިވާއިރު މުބާރާތުގައި އުފައްދާ ޑްރާމާތައް އަންނަ ރޯދަމަހު ދައްކާނީ ޓީވީއެމުންނެވެ.
އެންމެ މޮޅު ޑްރާމާއަކަށް 50،000 ރުފިޔާގެ ފައިސާގެ އިނާމް ހުށަހަޅާފައިވާ މުބާރާތް ކުރިއަށް ގެންދާނީ މަދުވެގެން ފަސް އޮފީހަކާ އެކުގައި ކަމަށާއި އަދި އެ އަދަދު ދިހަޔަކަށް ވުރެ ގިނަވެއްޖެ ނަމަ، ބައިވެރިކުރާނީ އެންމެ ރަނގަޅު ޕްރޮޕޯޒަލްތަކެއް ހުށަހަޅާ 10 އޮފީހެއް ކަމަށް އެންސީއޭގެ ކޯޑިނޭޓަރު އަދި ފިލްމީ ތަރި އަބްދުﷲ މުއާޒް (މުއާ) ވަނީ ވިދާޅުވެފައެވެ.
ފަންސަވީސް މިނިޓްގެ އުފެއްދުންތައް ބައިވެރިކުރާ މުބާރާތުގައި ހޮވާނީ އެންމެ މޮޅު އެކްޓަރު/ އެކްޓްރެސް އާއި އެންމެ މޮޅު ސަޕޯޓިން އެކްޓަރު/ އެކްޓްރެސް އާއި އެންމެ މޮޅު ޑްރާމާ އެވެ. އޭގެ އިތުރުން ބެލުންތެރިން އެސްއެމްއެސްކޮށްގެން ހޮވާ ވިއުއާސް ޗޮއިސް އެވޯޑެއް ވެސް ދޭނެ ކަމަށް މުއާ ވިދާޅުވި އެވެ.
"މުބާރާތުގެ މައިގަނޑު ބޭނުމަކީ ކެމެރާ ކުރިމައްޗަށް އާ މޫނުތަކެއް ތައާރަފްކުރުން. އެހެންވީމާ ޓެކްނިކަލް އެއްވެސް ވަނަތަކެއް ނުހޮވާނެ. ޓެކްނިކަލް ވަނަތައް ހޮވާއިރު ވާގޮތަކީ އެ އޮފީހެއްގެ މީހެއްގެ ނަން ޖަހާފައި، ޕްރޮފެޝަނަލް މީހުން ލައްވައި މަސައްކަތްކުރުވާފައި ހުރެއްޖެއްޔާ މައްސަލަތައް ދިމާވާނެ. އެހެންވީމާ ސިނެމަޓޯގްރަފީ، އެޑިޓިން އަދި ޑައިރެކްޝަން ކަހަލަ ކެޓެގެރީތަކަކުން ޖަޖެއް ނުކުރާނެ،" އޭނާ ވިދާޅުވި އެވެ.
އެންސީއޭ އިން ބުނިގޮތުގައި ޑްރާމާގައި ބައިވެރިވެވޭނީ އެ އޮފީހެއްގެ މުވައްޒަފުންނަށް އެކަންޏެވެ. އަދި ފިލްމީ ދާއިރާގައި އަމަލީގޮތުން އުޅޭ މީހަކު ނުވަތަ ކުރިން އުޅެފައި ހުރި މީހަކަށް ވެސް ޑްރާމާ ކުޅެވިދާނެ ކަމަށާއި އެކަމަކު އެފަދަ މީހަކަށް ވަނައެއް ނުދޭނެ ކަމަށް އެ ތަނުން ބުންޏެވެ.
"އެންޓަޓެއިންމެންޓް ދާއިރާ އަށް މީހުން ތައާރަފްކޮށް ބިނާކުރުން މީގެ މަގްސަދަކީ،" އޭނާ ވިދާޅުވި އެވެ.
ޓީވީއެމުން 1994 ވަނަ އަހަރުން 2006 ވަނަ އަހަރާ ހަމައަށް ކުރިއަށް ގެންދިޔަ ޓެލެޑްރާމާ މުބާރާތްތަކުގައި ފެންވަރު ރަނގަޅު އުފެއްދުންތަކެއް ދައްކާފައިވެ އެވެ. އަދި އެ މުބާރާތުގެ ތެރެއިން ހުނަރުވެރި އެކްޓަރުންނާއި ޑައިރެކްޓަރުންނާއި ލިޔުންތެރިން ފިލްމީ ދާއިރާ އަށް ތައާރަފްވި އެވެ.