އައްޑޫ ސިޓީގައި ހުންނަ ޕޮލިސް ކޮލެޖުން ކާނާ ވިހަވެ އައިސީޔޫގައި ފަރުވާ ދެމުންދިޔަ ދަރިވަރު ވޯޑަށް ބަދަލުކޮށްފިއެވެ.
ޕޮލިސް ކޮލެޖްގެ ދަރިވަރުންތަކެއް ކާނާ ވިހަވެ ފަރުވާއަށް އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) އަށް ގެންގޮސްފައިވާއިރު، އޭގެތެރެއިން އެއް ދަރިވަރަކަށް އައީ އައިސީޔޫގައި ފަރުވާދެމުންނެވެ.
ފުލުހުން މިއަދު ބުނެފައިވަނީ އައިސީޔޫގަިއ ފަރުވާދެމުންދިޔަ ދަރިވަރުވެސް މިހާރު ވޯޑަށް ބަދަލުކޮށްފައިވާ ކަމަށެވެ. ވޯޑުގައި މިހާރު ދެ ދަރިވަރުންތިބިއިރު، އެ ދެ ދަރިވަރުންގެ ހާލުވެސް ރަނގަޅުކަމަށް ފުލުހުން މައުލޫމާތުދެއެވެ.
ކާނާ ވިހަވެ، ހާލު ދެރަވެގެން 32 ދަރިވަަރަކު އެޑްމިޓްކޮށް ފަރުވާ ދީފައިވެއެވެ. ކާނާ ވިހަވި ސަބަބު ދެނެގަތުމުގެ މަސައްކަތް ފުލުުހުން އަންނަނީ ހޮސްޕިޓަލާ ގުޅިގެން ކުރަމުން ކަމަށް ފުލުހުންގެ ތަރުޖަމާނު އަދި އެސިސްޓަންޓް ކޮމިޝަނަރު އަހުމަދު ޝިފާން ވިދާޅުވިއެވެ.
ޕޮލިސް ކޮލެޖްގައި ކޭޓަރިންގެ އިންތިޒާމު ހަމަޖައްސާފައި އޮންނަނީ އައުޓްސޯސްކޮށްގެން އަމިއްލަ ފަރާތަކާ ހަވާލުކޮށްގެންނެވެ. މިއީ އެތަނުގައި ކާނާ ވިހަވި ބޮޑު މައްސަލައެއް ހިނގި ފުރަތަމަ ފަހަރެވެ.