މާލޭގައި ހުންނަ ކޭއެފްސީ ރެސްޓޯރެންޓުގެ ބިއްލޫރިގަނޑު ތަޅާލި މައްސަލައިގައި ހައްޔަރު ކުރި މީހާގެ ބަންދު މުއްދަތު ޖަހައިފިއެވެ.
ކޭއެފްސީ ރެސްޓޯރެންޓުގެ ބިއްލޫރިގަނޑު މިދިޔަ ހޯމަ ދުވަހުގެ ރޭ ތަޅާލި މައްސަލައިގައި 48 އަހަރުގެ ދިވެހި ފިރިހެނަކު ކޯޓު އަމުރެއްގެ ދަށުން ހައްޔަރު ކޮށްފައިވަނީ އިއްޔެއެވެ.
ފުލުހުން މިއަދު ބުނެފައިވަނީ އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 30 ދުވަހަށް ބަންދު ކުރުމަށް އަމަރުކޮށްފައިވާ ކަމަށެވެ.
މިފަހުންވެސް ކޭއެފްސީ ރެސްޓޯރެންޓުގެ ބިއްލޫރިގަނޑު ތަޅާލާފައިވެއެވެ. އެ މައްސަލައިގައި އަދި މީހަކު ހައްޔަރު ކޮށްފައެއް ނުވެއެވެ.
އިޒްރޭލުން ފަލަސްތީނާ ދެކޮޅަށް ހިންގަމުންދާ ޖަރީމާތަކާ ގުޅިގެން ރާއްޖޭގައި ވެސް "ކޭއެފްސީ" ބޮއިކޮޓް ކުރަން ގޮވައިލަމުން ގޮސްފައިވެއެވެ. އެގޮތުން މީގެ ކުރިން ވަނީ ކޭއެފްސީ ކައިރީ މުޒާހަރާކޮށް، އެތަނާ ޖެހިގެން އަންނަ "ޕިއްޒާ ހަޓް" އަށް ވެސް ބަޔަކު ކަޅުތެޔޮ ޖަހާފައިވެއެވެ.