ރާއްޖޭގައި ކުރިއަށްގެންދާ އެކި މަޝްރޫއުތަކަށް ޗައިނާގެ އެހީތެރިކަން ހޯދުމާ ގުޅޭގޮތުން އެގައުމުގެ އެކި ކުންފުނިތަކާއެކު، ފޮރިން މިނިސްޓަރު މޫސާ ޒަމީރު މަޝްވަރާ ކުރައްވައިފިއެވެ.
މިނިސްޓަރު ޒަމީރު ޗައިނާއަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން އަންނަނީ އެގައުމުގެ އެކި ކުންފުނިތަކާއެކު މަޝްވަރާތައް ކުރިއަށް ގެންދަވަމުންނެވެ. އެގޮތުން ޗައިނާ މެޝިނަރީ އިންޖިނިއަރިން ކޯޕަރޭޝަން، ޗައިނާ ޓިއަންޔިން އަދި ޗައިނާ ސްޓޭޓް ކޮންސްޓްރަކްޝަން އިންޖިނިއަރިން ކޯޕަރޭޝަންގެ ވެރިންނާ ބައްދަލުކުރައްވާފައިވެއެވެ.
އެގޮތުން ޗައިނާ ޓިއަންޔިންގެ ޗެއާމަން އަދި ޓީމާ މިނިސްޓަރު ޒަމީރު ބައްދަލުކުރެއްވިއިރު، ކުނިމެނޭޖު ކުރުމާއި އިޔާދަކުރަނިވި ހަކަތައިގެ ތަރައްގީގެ އެކި މަޝްރޫއުތަކުގައި ގުޅިގެން މަސައްކަތް ކުރުމާ ގުޅޭގޮތުން މަޝްވަރާ ކުރައްވާފައިވެއެވެ.
މީގެއިތުރުން ޗައިނާ މެޝިނަރީ އިންޖިނިއަރިން ކޯޕަރޭޝަންގެ ޗެއާމަންއާ އެކު ކުރިއަށްގެންދިޔަ މަޝްވަރާތަކުގައި ވަނީ ރަސްމާލެ އާއި ގުޅިފަޅު މަޝްރޫއުގެ މަސައްކަތުގައި ގުޅިގެން މަސައްކަތްކުރުމާ ގުޅޭގޮތުން މަޝްވަރާ ކުރައްވާފައެވެ.
މިނިސްޓަރު ޒަމީރު ޗައިނާއަށް ކުރައްވާ ދަތުރުފުޅަކީ 24 ވަނަ ދުވަހުގެ ނިޔަލަށް ކުރައްވާ ދަތުރުފުޅެކެވެ. މި ދަތުރުގައި މިނިސްޓަރު ޒަމީރުގެ އަރިހުގައި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު އަދި ފިނޭންސް މިނިސްޓަރު ޑރ. މުހައްމަދު ޝަފީގް ބައިވެރިވެވަޑައިގެންފައިވެއެވެ.