ފެހި ޤާނޫނު އަސާސީ ގެނެއުމަށް ދިވެހި ރައްޔިތުން ކުރި މަސައްކަތުގެ ތެރޭގައި މުޒާހަރާ ކުރުމަށް އައްޑޫ ސިޓީ އިން މާލެ އައި ނަމޫނާ ދޯނި ކަޑުމަތިން ހިފައްހައްޓާ އެދޯނި ފައްތާލުމަށް އޭރުގެ ސަލާމަތީ ބާރުތަކުން ކުރި މަސައްކަތް މިއަދު އަނެއްކާވެސް އިއާދަ ވަމުން އަންނަ ކަމަށް މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ވިދާޅުވެއްޖެއެވެ.
ރައީސް ޔާމީން ސަރުކާރުގެ އަނިޔާވެރިކަމާ ދެކޮޅަށް އިދިކޮޅު ފަރާތްތަކުން މާލޭގައި މިހާރު ސިލްސިލާކޮށް ކުރިއަށްގެންދާ މުޒާހަރާތަކުގެ ތެރެއިން ރޭ ނަލަހިޔާ ކުރިމަތީ ބޭއްވި މުޒާހަރާގައި ވާހަކަ ދައްކަވަމުން އިންތި ވިދާޅުވީ، ނަމޫނާ ދޯންޏާއި އެނޫން ދޯނި ދަކުގައިވެސް މާލެއައުމަށް ދަތުރުކުރި އެތައް ދޯންޏެއް އޭރުގެ ޤާނޫންއަސާސީއާ ވެސް ޚިލާފަށް ކަނަޑުމަތިން ހިފަހައްޓާ، މާލެ އައުމަށް ދަތުރުކުރި އެތައް ބައެއްގެ މައްޗަށް ނުހައްގުން ދައުވާކޮށް އެތައް އަނިޔާއެއް ދީފައިވާ ކަމަށެވެ.
އިންތި ވިދާޅުވީ އެދުވަސްވަރު ފެހި ޤާނޫންއަސާސީ ގެނައުމަށް އެތައް ރައްޔިތުންނެއްގެ ގައިން ލޭ އޮހޮރި ނާއިންސާފުން އެތައް އަދަބުތަކެއް ރައްޔިތުންނަށް ދީފައިވާ ކަމަށެވެ. އެހެންނަމަވެސް ރައީސް ޔާމީންގެ ސަރުކާރުން އަނެއްކާ ވެސް ފެނިގެން މިދަނީ ޤާނޫނުއަސާސީއެއް އޮވެމެ، އެ ޤާނޫން އަސާސީއަކީ ނެތް އެއްޗަކަށް ހަދާ ރައްޔިތުންނަށް އަނިޔާވެރި ވަމުންދާ މަންޒަރު ކަމަށް އިންތި ވިދާޅުވިއެވެ.
ރައްޔިތުންގެ މަޖިލީހުގެ ވިލިމާފަންނު ދާއިރާގެ މެންބަރު އަޙްމަދު ނިހާން ހުސައިން މަނިކަށް އިޝާރާތް ކުރައްވާ އިންތި ވިދާޅުވީ ސަރުކާރުގެ ފަރާތުން މަޖިލީހުގައި މެޖޯރިޓީ ލީޑަރަކަށް އިންނަވާ، މޭޑޭއަށް މާލެ އައި ހުރިހާ ދޯނިތައް އެއްގަޑި އިރުތެރޭގައި މާލޭން ފުރުމަށް އިންޒާރު ދިން ކަމަށެވެ. އަދި ހަމަ އެހެންމެ އެއްގަޑިއިރުތެރޭ ނުފުރައިފިނަމަ ހުރިހާ ދޯނިތަކެއްގެ ރަޖިސްޓްރީ ބާތިލްކުރާނެ ކަމަށް ޣައިރު ޤާނޫނީ އިންޒާރުތައް ދީފައިވާ ކަމަށެވެ.