މޯލްޑިވްސް ޕޯޓްސް ލިމިޓަޑް (އެމްޕީއެލް) އާއި ޔޫއެން ޓްރޭޑް އެންޑް ޑެވަލޮޕްމަންޓް އަންކްޓަޑް ގުޅިގެން "މޮޑަން ޕޯޓް މެނޭޖްމަންޓް" ގެ ނަމުގައި މިއަދު ކޯހެއް ފަށައިފި އެވެ.
މި ކޯސް ފެށުމަށް ހެނދުނު އެމްޕީއެލްގެ ހެޑް އޮފީހުގައު ބޭއްވި ރަސްމިއްޔާތުގައި އެ ކުންފުނީގެޗީފް ކޯޕަރޭޓް އޮފިސަރު އައިޝަތު ޝިމްލާ ވިދާޅުވީ މި ކޯހަކީ މެރިޓައިމް ޕޯޓްގެ ދާއިރާ އިން މީހުން ބިނާކުރުމަށް ހިންގޭ މުހިއްމު ކޯހެއް ކަމަށެވެ. އަދި ތައުލީމާއި ތަމްރީނު ހާސިލްކުރުމުގައި އެ ކުންފުނީގެ ހުރިހާ މުވައްޒަފުން ވެސް ގުޅިގެން، ކުރިއެރުން ހޯދަން މަސައްކަތް ކުރާނެ ކަމަށް ވިދާޅުވި އެވެ.
"އަޅުގަނޑުމެންގެ ތެރޭގައި ވާދަވެރިކަންވެސް އޮންނަންވާނީ ރަނގަޅު ގޮތުގައި. އަދި އަޅުގަނޑުމެން ޝާމިލްވާން އެންމެ ރަނގަޅު ވާދަވެރިކަމަކީ އިލްމު ހާސިލްކުރުމަށް. އަޅުގަނޑު ހަނދާންކޮށް ދޭން ބޭނުން ވަނީ މި ތަމްރީނުގައި ތިޔަ ބައިވެރިން ތި ތިބީ އެކަންޏެއް ނޫންކަން،" ޝިމްލާ ވިދާޅުވި އެވެ. "އަޅުގަނޑުމެންވެސް މިތިބީ ތިޔަ ހުރިހާ ބައިވެރިންނާއެކު. ހަމައެކަނި އެއް ތަނެއްގައި މަސައްކަތްކުރާ މުވައްޒަފުންގެ ގޮތުގައެއް ނޫން. އެކަމަކު ގުޅިގެން، އުނގެނި ކުރިއެރުން ހޯދާ އާއިލާއެއްގެ ގޮތުގައި."
މިއީ "މޮޑަން ޕޯޓް މެނޭޖްމަންޓް" ކޯސް ރާއްޖޭގައި ހިންގާ ތިން ވަނަ ފަހަރެވެ. ދޮޅު އަހަރުގެ މި ކޯސް ބްލޮކް މޯޑަށް ކުރިއަށް ގެންދާއިރު މި އަހަރު ޖުމްލަ 20 ބައިވެރިން ހިމެނެ އެވެ. އޭގެ ތެރޭގައި އެމްޕީއެލްގެ މުވައްޒަފުންގެ އިތުރުން މޯލްޑިވްސް ސްޓޭޓް ޝިޕިން (އެމްއެސްއެސް) އަދި އިމިގްރޭޝަންގެ މުވައްޒަފުންތަކެއް ވެސް ހިމެނެ އެވެ.
މި ކޯހުގެ ފުރަތަމަ މޮޑިއުލްތައް ނަގައި ދޭނީ އަންކްޓަޑްގެ އިންފޮމޭޝަންސް ސިސްޓަމްސް އޮފިސަރު ތޯމަޒް ކުލާގާ އާއި ބްރެމޯ ޕޯޓް ކޮމްޕެނީގެ ޑިރެކްޓަރު ޖޯ ހައިނީ އެވެ.