މޯލްޑިވްސް މަނިޓަރީ އޮތޯރިޓީގެ ގަވަރުނަރުގެ މަގާމުން އަލީ ހާޝިމް ވަކިކުރުމުގެ މައްސަލަ ރައްޔިތުންގެ މަޖިލީހުގެ މާދަމާގެ ޖަލްސާ އަށް އެޖެންޑާކޮށްފި އެވެ.
ގަވަރުނަރުގެ މަގާމުން ހާޝިމް ވަކިކުރަން މަޖިލީހުގެ ތަޅުމަށް ހުށަހަޅަން، މަޖިލިހުގެ މާލިއްޔަތު ކޮމިޓީން އިއްޔެ ވަނީ ފާސްކޮށްފަ އެވެ. މި މައްސަލަ މާދަމާގެ ޖަލްސާ އަށް މިހާރު ވަނީ އެޖެންޑާކޮށްފަ އެވެ.
ގަވަނަރު ވަކިކުރަން ކޮމިޓީ އަށް ހުށަހެޅުއްވީ މަޖިލިހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމެވެ. ހާޝިމް މަޤާމުން ވަކި ކުރަން ނިންމާފައި ވަނީ ރާއްޖޭގެ އިގުތިސާދީ ހާލަތު ރަނގަޅު ކުރުމަށް ގަވަރުނަރުގެ ޒިންމާތަކާއި މަސްއޫލިއްޔަތުތައް އަދާ ނުކުރައްވާ ކަމަށް ތުހުމަތުކޮށެވެ.
ގަވަރުނަރުކަމުން ހާޝިމް ވަކިކުރަން މިއަދި ފާސްވީ މާލިއްޔަތު ކޮމިޓީގެ އިއްތިފާގުންނެވެ.
ގަވަރުނަރަށް ޖަވާބުދާރީވުމަށް ކޮމިޓީން ތިން ފުރުސަތެއް ދިނެވެ. ނަމަވެސް އާލާސްކަންފުޅާ އުޅުއްވާތީ އިއްޔެ އާއި އޭގެ ކުރީ ދުވަހުގެ ބައްދަލުވުމަށް ވެސް ވަޑައިނުގެންނެވޭ ކަން އެމްއެމްއޭ އިން އަންގާފައިވެ އެވެ. އަދި އެންމެ ފަހުން ތިން ފުރުސަތުގައި މިއަދު ވެސް ހާޝިމް ހާޒިރުވެވަޑައިގެންފައެއް ނުވެ އެވެ.
މަޖިލީހަށް އިއްޔެ ހާޒިރުވެ ވަޑައިނުގަތް ނަމަވެސް އޭނަ އިއްޔެ ސިޓީން ޖަވާބު ދެއްވާފައިވެ އެެވެ. އެ ސިޓީގައި ވިދާޅުވެފައި އޮތީ ސަރުކާރުތަކަށް ގަވަރުނަރުގެ ހައިސިއްޔަތުން ލަފާ ދެއްވާ ކަމަށާއި ނަމަވެސް ސަރުކާރުން އިރުޝާދުތަކުގެ އަޑު ނާއްސަވާ ކަމަށެވެ.
މަރުކަޒީ ބޭންކްގެ ގަވަރުނަރު ކަމަށް ހާޝިމް އައްޔަންކުރީ ސެޕްޓެމްބަރު 8، 2019 ގަ އެވެ. އޭނަ ކުރިން ފިނޭންސް މިނިސްޓަރުކަން ވެސް ކުރެއްވި އެވެ.