ވޯޓަކާ ނުލައި އެމްޑީޕީގެ ދާއިރާތަކުންނާއި ރަށްތަކުން ހުސްވެފައިވާ ނައިބު ރައީސްކަމުގެ މަގާމަށް 34 މީހަކު ހޮވިއްޖެ އެވެ.
އެމްޑީޕީން މިއަދު ވަނީ ވޯޓަކާ ނުލާ އިންތިހާބުވި 34 ނައިބު ރައީސުންގެ ނަންތައް އާންމުކޮށް އިއުލާންކޮށްފަ އެވެ. އޭގެ ތެރޭގައި ހިމެނެނީ 23 ރަށެއްގެ ނައިބު ރައީސުންނާއި ހަތް ދާއިރާއެއްގެ ނައިބު ރައީސުން އަދި ހަތަރު ސިޓީއެއްގެ ނައިބު ރައީސުންނެވެ.
އެމްޑީޕީގެ އެތެރޭގެ އިންތިހާބު އޮންނާނީ އަންނަ އޮގަސްޓް މަހު ދެވަނަ ދުވަހު ކަމަށްވާއިރު، އެ ދުވަހު އެމްޑީޕީގެ ގައުމީ މަޖިލީހުގައި ހުސްވެފައިވާ މަގާމުތަކަށް ވެސް ބޭފުޅުން އިންތިހާބު ކުރުން ކުރިއަށްދާނެ އެވެ.
އެމްޑީފީގެ ހިންގުން ހަރުދަނާ ކުރުމުގެ ގޮތުން އެ ޕާޓީގެ މަގުޗާޓަށް ހިޔާލު ހޯދަން ޕާޓީގެ ލީޑަޝިޕުން މިހާރު އަންނަނީ ދެކުނުގެ ރަށްތަކައް ދަތުރުތަކެއް ކުރަމުންނެވެ. މި ދަތުރުގައި އެމްޑީޕީގެ ފަރާތުން އެންމެ އިސްކޮށް ބައިވެރިވެވަޑައިގަންނަވަނީ ޗެއާޕާސަން ފައްޔާޒް އިސްމާއިލެވެ.