ޖުޑިޝަރީ އިސްލާހު ކުރުމުގެ ވާހަކަ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ދެއްކީ ހަމައެކަނި ވާހަކައެއްގެ ގޮތުގައި ކަމަށާއި އެކަމުގެ މަސައްކަތްތެއް ކޮށްފައި ނުވާކަމަށް ބާރަށު ދާއިރާގެ މެންބަރު އިބްރާޙިމް ޝުޖާއު ވިދާޅުވެއްޖެއެވެ.
ބަންޑާރަނައިބު ނުހިމެނޭ ގޮތަށް ބާ ކައުންސިލްގެ އެގްޒެކެޓިވް ކޮމިޓީ އެކުލަވާލުމަށް ދިވެހިރާއްޖޭގެ ޤާނޫނީ ފަންނުގެ ޤާނޫނަށް ހުށަހަޅާފައިވާ އިސްލާހުގެ ބަހުސްގައި މި އިސްލާހަށް ތާއީދު ކުރައްވާ ވާހަކަ ދައްކަވަމުން ޝުޖާއު ވިދާޅުވީ، ޖުޑިޝަރީ އިސްލާހުގެ ކުރުމުގެ މަސްއޫލިއްޔަތު ރައްޔިތުން ރައީސް ޑރ. މުހައްމަދު މުއިއްޒުއާ ހަވާލުކުރީ ފޮނި އުންމީދުތަކާއެކު ކަމަށެވެ. ޝަރުއީ ނިޒާމު އިސްލާހު ކުރުމުގެ ވާހަކަތަކަކީ ކުރީގެ ހުރިހާ ސަރުކާރުތަކުންވެސް ދައްކާފައިވާ ވާހަކަތަކެއްކަން ފާހަގަކޮށް ޝުޖާއު ވިދާޅުވީ ރައީސް މުއިއްޒުއަށް މަޖިލީހުގެ ބޮޑު މެޖޯރިޓީއެއް ރައްޔިތުން ދިނީ ފަނޑިޔާރުގެއަކީ ރައްޔިތުންގެ އިތުބާރު އޮތް ތަނަކަށް ހެދުމަށް ކަމަށެވެ.
"މި ޤާނޫނުން ފެނިގެންދަނީ، އެއްކޮށް ސަރުކާރުން ނުފޫޒުތަކުން މި ދާއިރާ މިނިވަންވެގެންދާ މަންޒަރު." ޝުޖާއު ވިދާޅުވިއެވެ.
ރައީސްގެ ކެބިނެޓްގައި ހިމެނޭ ބަންޑާރަނައިބު ބާކައުންސިލްގެ އެގްޒެކްޓިވް ކޮމިޓީން ވަކިކުރުމަށް ސަރުކާރުން ހުށަހެޅުމުން ފެނިގެންދަނީ ރައީސް މުއިއްޒުގެ އިހުލާސްތެރިކަންކަމަށް ޝުޖާއު ވިދާޅުވިއެވެ. އަދި މި އިސްލާހުން ރައްޔިތުންނަށް އުންމީދުތަކެއް ލިބިދޭކަމަށް ވެސް ވިދާޅުވިއެވެ.
މީގެއިތުރުން ޝުޖާއު ވިދާޅުވީ ޖުޑިޝަރީ އިސްލާހު ކުރުމުގެ ވާހަކަ އެމްޑީޕީން ދެއްކީ ހަމައެކަނި ދައްކާ ވާހަކައެއްގެ ގޮތުގައި ކަމަށާއި، ޖޭއެސްސީ މިނިވަންކުރާ ވާހަކަ ފާއިތުވި 5 އަހަރު އިވުނު ކަމަށެވެ. އެހެންނަމަވެސް އެކަން އެމްޑީޕީ ވެރިކަމުގައި ނުފެނުނުކަން ޝުޖާއު ފާހަގަ ކުރެއްވިއެވެ.
ސަރުކާރުގެ ފަރާތުން ދިވެހިރާއްޖޭގެ ޤާނޫނީ ފަންނުގެ ޤާނޫނަށް ހުށަހަޅާފައިވާ އިސްލާހަކީ ސަރުކާރުގެ ނުފޫޒު އަދުލުއިންސާފުގެ ދާއިރާއަށް ވަނުމަށްޓަކައި ހުރި ހުރިހާ ދޮރުތަކެއް ބަންދުކުރުމަށް ހުށަހަޅާފައިވާ އިސްލާހެއްކަން ޝުޖާއު ފާހަގަ ކުރެއްވިއެވެ. އަދި ވިދާޅުގވީ ޤާނޫނީ ފަންނުގެ ބޭފުޅުންނަށް ހިމާޔަތާއި ރައްކާތެރިކަންދީ އެބޭފުޅުންނަކީ މުސްތަގިއްލު ބައެއްގެ ގޮތުގައި މި އިސްހުން ކަނޑައެޅިގެން ދާ ކަމަށެވެ.
މި އިސްލާހު ފާސްވެ ތަސްދީގުކުރެވުމުން މިދާއިރާއަށް ސަރުކާރުގެ އެއްވެސް ނުފޫޒެއް ނޯންނާނެ ކަމަށް ޝުޖާއު ވިދާޅުވިއެވެ.