އިސްލާމީ ޝަރީއާ އިން ލޯ ޑިގްރީއެއް އޮތް ނަމަ ގާނޫނީ ވަކީލުކަމުގެ ހުއްދަ ދޭން ރައްޔިތުންގެ މަޖިލީހުގެ ހުރާ ދާއިރާގެ މެންބަރު ޑރ. އަނާރާ ނައީމު ގޮވާލައްވައިފި އެވެ.
މަޖިލީހުގެ މިއަދުގެ ޖަލްސާގައި އޭނަ ވިދާޅުވީ ގާނޫނީ ވަކީލަކަށްވުމުގެ ޝަރުތުތަކުގެ ތެރޭގައި ގާނޫނީ ރޮނގުން ތައުލީމު ހާސިލުކުރުން ހިމެނޭ އިރު، އޭގެ ތެރޭގައި އިސްލާމީ ޝަރީއާ ތައުލީމު ހާސިލުކުރުން ނުހިމެނޭތީ އެވެ. އެހެންވެ އަނާރާ ވިދާޅުވީ އެގޮތަށް، މިހާރު ބަހުސްކުރަމުންދާ ގާނޫނީ ފަންނުގެ ގާނޫނު އިސްލާހު ކުރުމުގެ ބިލު އިސްލާހުކުރަން ޖެހޭ ކަމަށެވެ.
"ސަބަބަކަށް ވަނީ ޝަރުއީ ދާއިރާ ހަގީގަތުގައި ވަރަށް ބޮޑަށް ގުޅުން އޮންނާނެ އިސްލާމީ ޝަރީއަތާ. ކީރިތި ގުރުއާނުގައި ވެސް ވަރަށް ގިނަ ހުކުމްފުޅުތައް އައިސް އެބަހުރި ވަރަށް ގިނަ ހައްދުތައް، ކުށްތަކަށް އެ އުގޫބާތް ދޭނެ ގޮތްތައް ޖުމްލަ ގޮތެއްގައި އައިސްފަ އެބަހުރި، ކީރިތި ގުރުއާނާ ސުންނަތުގައި،" އޭނަ ވިދާޅުވި އެވެ. "އެހެންވީމާ އެ ބައިތައް އެނގުމަކީ ވަރަށް މުހިއްމު ކަމެއް ކޮންމެ ގާނޫނީ ވަކީލަކަށް ވެސް."
އަނާރާ ވިދާޅުވީ ފަނޑިޔާރަކަށް ވެވެނީ ގާނޫނީ ވަކީލުކަންކޮށްގެން ކަމަށާއި ހުކުމް ކުރާ ފަރާތްތައް އިސްލާމީ ޝަރީއާގެ ރޮނގުން ތައުލީމު ހާސިލުކޮށްގެން ތިބުމަކީ ވަރަށް މުހިއްމު ކަމެއް ކަމަށެވެ.
"އެއީ ފުރަތަމަ ގާނޫނީ ވަކީލަކަށް ވެގެން ހަގީގަތުގައި ފަނޑިޔާރަކަށް ވެސް ވެވެނީ. އެހެންވީމާ ވަރަށް މުހިއްމު އެގޮތަށް އޮތުން،" އޭނަ ވިދާޅުވި އެވެ. "އޭރުން އިސްލާމީ ޝަރީއަތުގެ ރޮނގުން ތައުލީމު ހާސިލުކޮށްފައިވާ ފަރާތްތަކަށް ޝަރުއީ ދާއިރާއަށް ވަނުމުގެ ފުރުސަތު އޮންނާނީ."