ކުރީގެ ރައީސް އަބްދުﷲ ޔާމީންގެ ޝަރިއަތަށް ރައީސް ޑރ. މުހައްމަދު މުއިއްޒު ނުފޫޒު ނުފޯރުވާކަމަށް ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެއެވެ.
ޤާނޫނީ ފަންނުގެ ޤާނޫނަށް ހުށަހަޅާފައިވާ އިސްލާހަށް، ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން އައްބާސް ވިދާޅުވީ ވަކީލުންނަށް ދިމާވެފައިވާ ދަތިއުނދަގޫ ކަންކަމަށް ހައްލު ހޯދުމަކީ މަޖިލީހުން ކޮންމެހެންވެސް ކުރަންޖެހޭ ކަމެއް ކަމަށެވެ. އަދި ބާ ކައުންސިލް ސިޔާސީ ނުފޫޒުން އެއްކިބާވެތިބެ މަސައްކަތް ކުރުމަކީ މުހިންމު ކަމެއް ކަމަށްވެސް ވިދާޅުވިއެވެ.
ކުރީގެ ރައީސް އަބްދުﷲ ޔާމީންގެ ޝަރިއަތަށް ރައީސް ޑރ. މުހައްމަދު މުއިއްޒު ނުފޫޒު ފޯރުވާކަމަށް އިދިކޮޅު ފަރާތްތަކުން ދައްކަމުންދާ ވާހަކައަށްވެސް އައްބާސްވަނީ ރައްދު ދެއްވާފައެވެ.
"ސިޔާސީ ބޭނުމަކަށްޓަކައި، ޕާޓީ ނުހިނގާ އޮތީމާ ޕާޓީ އެކްޓިވް ކުރަންވެގެން، ރައީސް ޔާމީންގެ ޝަރީއަތަށް މިސަރުކާރުން ނުފޫޒުފޯރުވީއޭ. ދޮގެއް! ރައީސް ޑރ. މުހައްމަދު މުއިއްޒުގެ ސަރުކާރުން ރައީސް ޔާމީންގެ ޝަރީއަތަށް އެއްވެސް ނުފޫޒެއް ފޯރުވި ވާހަކަ އެއްވެސް ފަނޑިޔާރަކު ނެތް ވިދާޅުވެފަ. އެއީ ކަނޑައެޅިގެން ސިޔާސީ ބޭނުމަކަށް ވިދާޅުވި ވާހަކަތަކެއް." އައްބާސް ވިދާޅުވިއެވެ.
އައްބާސް ވިދާޅުވީ އެމްއެމްޕީއާރްސީގެ ތެރެއިން، ދިވެހި ރައްޔިތުންގެ ފައިސާއިން ބޮޑު ވައްކަމެއް ކުރިކަން އެނގޭ ކަމަށެވެ. އަދި އެ ވައްކަން ކުރީ ކޮންބައެއްކަމާއި، ވީއެންމެ އިންސާފުވެރިކޮށް މި މައްސަލަ ތަހުގީގުކޮށް މި ވައްކަންކުރި މީހުން ޖަލަށްލާންޖެހޭ ކަމަށްވެސް ވިދާޅުވިއެވެ.
މީގެއިތުރުން ވާހަކަ ދައްކަވަމުން އައްބާސް ވިދާޅުވީ ފަސް އަހަރުގެ ދައުރެއް ނިންމާލާއިރު ހޯދާ ނުހައްގު މުއްސަނދިކަން ހޯދަނީ ކިހިނެއްތޯ ބަލަންޖެހޭ ކަމަށްވެސް އައްބާސް ވިދާޅުވިއެވެ.