މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަލީ ހާޝިމް މަގާމުން މިއަދު ވަކިކުރައްވައިފި އެވެ.
ގަވަރުނަރު އަލީ ހާޝިމް މަގާމުން ވަކިކުރައްވާފައި މިވަނީ އޭނާ އެ މަގާމުން ވަކިކުރަން ރައީސް ޑރ. މުހައްމަދު މުއިއްޒަށް ލަފާ އެރުވުމަށް ރައްޔިތުންގެ މަޖިލީހުން މިއަދު ފާސްކޮށްފައިވަނިކޮށެވެ. ހާޝިމް މަގާމުން ވަކިކުރަން ރައީސަށް ލަފާ އެރުވުމަށް ފެންނަ ކަމަށް 63 މެންބަރުން ވޯޓު ދެއްވި އެވެ. ދެކޮޅަށް ވޯޓު ދެއްވީ ނުވަ މެންބަރުންނެވެ.
ރައީސް އޮފީހުން މިއަދު ބުނި ގޮތުގައި ހާޝިމް ވަކިކުރުމަށް ފަހު އެ މަގާމަށް ފިނޭންސް މިނިސްޓަރުގެ އެޑްވައިޒަރަކަށް މިހާރު ހުންނެވި ކުރީގެ ފިނޭންސް މިނިސްޓަރު އަހުމަދު މުނައްވަރު އައްޔަން ކުރުމަށް ރައީސް ވަނީ އޭނާގެ ނަން މިއަދު މަޖިލީހަށް ފޮނުއްވައިފަ އެވެ.
އެމްއެމްއޭގެ ގާނޫނު ބުނާ ގޮތުން ރައީސަށް، ގަވަރުނަރަކު އައްޔަން ކުރެވޭނީ މަޖިލީހުގެ ލަފަޔާ އެކީގަ އެވެ.
މަރުކަޒީ ބޭންކްގެ ގަވަރުނަރު ކަމަށް ހާޝިމް އައްޔަންކުރީ ސެޕްޓެމްބަރު 8، 2019 ގަ އެވެ. އޭނަ ކުރިން ފިނޭންސް މިނިސްޓަރުކަން ވެސް ކުރެއްވި އެވެ.