ލާމާރުކަޒީ ނިޒާމަށް ގެންނަ ބަދަލުތަކަށް ރައްޔިތުންގެ ހިޔާލު ހޯދާނެ ކަމަށް ލޯކަލް ގަވަމެންޓް މިނިސްޓަރު އާދަމް ޝަރީފް ވިދާޅުވެއްޖެ އެވެ.
ލޯކަލް ގަވަމެންޓް މިނިސްޓްރީން އާންމު ކުރި ވީޑިއޯއެއްގައި އާދަމް ޝަރީފް ވިދާޅުވީ, ލާމަރުކަޒީ ނިޒާމު ހަރުދަނާ ކުރުމާ ބެހޭ ދިރާސާއެއް ގައުމީ ޔުނިވާސިޓީން ހަދަމުންދާ ކަމަށާއި އެ ދިރާސާގެ ނަތީޖާ ލިބޭ ހިސާބުން ރައްޔިތުންނާއި އެކަމާ ގުޅޭ މަޝްވަރާތައް ފެށުމަށް ވާންޖެހޭ ތައްޔާރީތައް މިނިސްޓްރީން ވަމުންދާ ކަމަށެވެ.
މިނިސްޓްރީގެ އަމާޒަކީ ލާމަރުކަޒީ ގާނޫނަށް ގެންނަންޖެހޭ ބަދަލުތައް ދެނެގަނެ، އެކަމުގައި ރައްޔިތުންނަށް ފެންނަ ފުރިހަމަ ހިޔާލުތައް ހޯދުމަށް ފުޅާ ދާއިރާއެއްގައި މަސައްކަތް ކުރުން ކަމަށްވެސް ވިދާޅުވި އެވެ.
ދާދިފަހުން ޕީއެންސީން ބޭއްވި ޖަލްސާއެއްގައި ރައީސް ޑރ. މުހައްމަދު މުއިއްޒު ވަނީ ކައުންސިލްތަކުގެ ސައިޒު ކުޑަކުރަންޖެހޭ ކަމަށާއި ކައުންސިލްތައް ނުކަތާހާ ބޮޑު ކަމަށްވާއިރު، 300 މީހުން 500 މީހުން އަދި 1،000 މީހުން ދިރިއުޅޭ ރަށެއްގައި ކައުންސިލަރުންގެ ގޮތުގައި ފަސް މީހުން ނުވަތަ ހަތް މީހުން ހޮވުމަކީ ހަރަދު ބޮޑު ކަމެއް ކަމަށް ވިދާޅުވެފަ އެވެ.
އާބާދީގެ ގޮތުން ކުދި ރަށްތަކުގައި ކައުންސިލްގެ ރައީސަކާއި ނާއިބު ރައީސެެއް ހުރުމުން ފުދޭނެ ކަމަށާއި އަދި އެއަށް ވުރެ އާބާދީ ބޮޑެތި ރަށްތަކާއި ސިޓީތަކަށް މިހާރު އޮތް އަދަދަށް ވުރެ މަދު އަދަދެއް ކަނޑައެޅުމުން ކައުންސިލްތަކުގެ ސައިޒު ކުޑަކުރެވޭނެ ކަމަށް ރައީސް ވިދާޅުވި އެވެ. މިއީ ރައްޔިތުންނަށް ވެސް އެންމެ ފައިދާ ހުރި ގޮތް ކަމަށާއި އެކަން އެގޮތަށް ކުރުމަށް ގާނޫނުތަކަށް އިސްލާހު ހުށަހަޅުއްވާނެ ކަމަށް ވިދާޅުވި އެވެ.
ރާއްޖޭގައި ލާމަރުކަޒީ ގާނޫނަށް އަމަލު ކުރަމުން އަންނަނީ 2008 ގައި ބޭއްވި ރިޔާސީ އިންތިހާބުގެ ފަހުންނެވެ.