މަސްއޫލިއްޔަތު އަދާނުކުރާނަމަ ޕްރޮސިކިއުޓާ ޖެނެރަލްވެސް މަގާމުން ވަކިކުރާނެ ކަމަށް ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ ސަރުކާރުގެ ފަރާތުން މަނަދޫ ދާއިރާގެ މެންބަރު ހުސްނީ މުބާރިކް ޖިނާއީ އިޖުރާއަތުގެ ޤާނޫނަށް ހުށަހަޅާފައިވާ އިސްލާހުގެ ބަހުސް ކުރިއަށް ގެންގޮސްފައެވެ.
މި ބަހުސްގައި ވާހަކަ ދައްކަވަމުން އައްބާސް ވިދާޅުވީ، ޕްރޮސިކިއުޓާ ޖެނެރަލް އަކީ އެއިރެއްގައި އޮންނަ ސަރުކާރެއްގެ ޕްރޮސިކިއުޓާ ޖެނެރަލް ނޫން ކަމަށާއި އެއީ ދިވެހި ރައްޔިތުންގެ ޕްރޮސިކިއުޓާ ޖެނެރަލް ކަމަށެވެ. އައްބާސް ވިދާޅުވީ ޕްރޮސިކިއުޓާ ޖެނެރަލްވެސް އެބާފުޅާގެ ޤާނޫނީ ޒިންމާ އަދާކުރަންޖެހޭ ކަމަށެވެ.
"އަދާނުކުރެވެންޏާ މިހާރުން މިހާރަށް އިސްތިއުފާ ދެއްވާފަ ގެއަށް ވަޑައިގަންނަވަންވީ. އެހެންނޫނީ ގަވަރުނަރު ބޭރުކުރިގޮތަށް އަޅުގަނޑުމެން ބޭރުކުރާނަން." އައްބާސް ވިދާޅުވިއެވެ.
އައްބާސް ވިދާޅުވީ ވާނުވާގެ މައްސަލަ ނިމުމަކަށް ގެންނަންޖެހޭ ކަމަށާއި ޕްރޮސިކިއުޓާ ޖެނެރަލަށް ލިބިދީފައިވާ ބާރުގެ ބޭނުންކޮށްގެން ނަމަވެސް ވާނުވާގެ މައްސަލައަށް އަވަސް ހައްލެއް ހޯދަންޖެހޭ ކަމަށެވެ. އައްބާސްވަނީ އޭނާގެ ދާއިރާގެ ކުއްޖަކު 6 އަހަރު ވާނުވާގައި ޖަލުގައި އޮތުމަށްފަހު މައުސޫމް މީހެއްގެ ގޮތުގައި ޖަލުން ސަލާމަތްވެފައިވާކަން ފާހަގަ ކުރައްވާފައެވެ.
ޖުޑިޝަރީއަށް އަތްބާނާ ނުފޫޒު ފޯރުވުމަކީ ރައީސް ޑރ. މުހައްމަދު މުއިއްޒު ކުރައްވާނެ ކަމެއް ނޫންކަން ފާހަގަ ކުރައްވާ އައްބާސް ވިދާޅުވީ ޖުޑީޝަރީގެ ކަންކަން މަތިކޮށްފައިވާ ޕީޖީއާއި ބަންޑާރަނައިބާއި ފަނޑިޔާރުން އެބޭފުޅުންގެ ޒިންމާތައް އަދާކުރަންޖެހޭ ކަމަށެވެ.