ރައީސް ޑރ. މުހައްމަދު މުއިއްޒުއަކީ ސްމާޓް ރައީސެއް ކަމަށާއި އެމަނިކުފާނު މަޖިލީހަށް ފޮނުވަނީ ސްމާޓް ޤާނޫނު ކަމަށް ތުލުސްދޫ ދާއިރާގެ މެންބަރު އިބްރާޙިމް ނަސީމް ވިދާޅުވެއްޖެއެވެ.
ޖިނާއީ އިޖުރާއަތުގެ ޤާނޫނަށް ހުށަހަޅާފައިވާ އިސްލާހަށް މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ނަސީމް ވިދާޅުވީ، ކުށްކުރާ މީހުން މިހާރު ކުށަށް އަރައިގަންނަނީ މީގެކުރިން އެކަން ކުރަމުންއައި ގޮތާ ހިލާފަށް ކަމަށެވެ.
މީގެކުރިން ވައްކަންކުރާ މީހުން އެކަން ކުރާގޮތް އެނގޭ ކަމަށާއި، އެހެންނަމަވެސް ވައްކަން ކޮށް ފައިސާ ފޭރުން މީހުން މިހާރު އުޅެނީ ކޯޓޫފަޓުލޫނުގައި ކަމަށް ނަސީމް ވިދާޅުވިއެވެ.
"އަޅުގަނޑުމެން ބަދަލުވެގެން ދެން މިމީހުން ހިފާހައްޔަރު ކުރެވޭނީ، އެބަދަލު މިހާރު ޤާނޫނަށް ގެންނަން މިއުޅެނީ." ނަސީމް ވިދާޅުވިއެވެ.
ވަގުން ވައްކަން ކުރާގޮތް މިހާރު ބަދަލުކޮށްފައިވާއިރު އެމީހުން ހައްޔަރު ކުރެވޭނީ ޤާނޫނުތަކާއި ކަންކަންވެސް ބަދަލުކޮށްގެންކަން ނަސީމް ފާހަގަ ކުރެއްވިއެވެ.
"އަޅުގަނޑުމެން ޖެހޭނީ އެއަށްވުރެއް ސްމާޓްވާން. އެކަމަށް ސްމާޓް ރައީސުލްޖުމްހޫރިއްޔާ، ސްމާޓް ޤާނޫނު ފޮނުވަނީ." ނަސީމް ވިދާޅުވިއެވެ.
މިހާރު ކުށްތަކަށް އަރައިގަންނަނީ އިލެކްޓްރޯނިކް ވަސީލަތްތައް ކަމަށްވާ ފޯނާއި އީމެއިލް މެދުވެރިކޮށްކަން ފާހަގަކޮށް ނަސީމް ވަނީ އެފަދަ ގޮތްގޮތުން ހިންގާ ކުށްތައް އިތުރުވެފައިވާކަން ފާހަގަކޮށްފައެވެ. އެހެންކަމުން އިލޮކްޓްރޯނިކް ހެކިބަސް ނެގޭނެގޮތްތައް ހިމަނަންޖެހޭކަން ނަސީމް ފާހަގަކުރެެއްވިއެވެ.