ސިޔާސީ މުވައްޒަފުންގެ އަދަދު ސިއްރު ނުކުރެވޭނެ ކަމަށް ހިތަދޫ މެދު ދާއިރާގެ މެމްބަރު އަހުމަދު އަޒާން ވިދާޅުވެއްޖެ އެވެ.
އަޒާން މިހެން ވިދާޅުވީ ސަރުކާރުގެ ސިޔާސަތު އެކުލަވައިލުމަށް ހުރަސް އެޅޭ ކަމަށް ބުނެ އެޑިއުކޭޝަން މިނިސްޓްރީގައި ތިބި ސިޔާސީ މުވައްޒަފުންގެ އަދަދު ސިއްރު ކުރަން އެ މިނިސްޓްރީން ނިންމުމާ ގުޅިގެންނެވެ.
ކުރިން ނޫސްވެރިއެއްގެ ގޮތުގައި މަސައްކަތް ކުރިއިރު މައުލޫމާތުތައް ހާމަކުރުމަށް ކުރީ ސަރުކާރަށް އެންމެ ބޮޑަށް ޕްރެޝަރު ކުރި އެކަކީ އަޒާން ކަމަށްވާއިރު، އެޑިއުކޭޝަންގެ މި ނިންމުމާ ގުޅިގެން އަޒާން ވިދާޅުވީ ސަރުކާރުގެ ސިޔާސީ މުވައްޒަފުންގެ އަދަދު ސިއްރު ނުކުރެވޭނެ ކަމަށާއި މިއީ ސަރުކާރާ މެދު ރައްޔިތުންގެ އިތުބާރު ގެއްލޭނެ ކަމެއް ކަމަށެވެ. އަދި މި ނިންމުން މުރާޖައާ ކުރަން ޖެހޭ ކަމަށްވެސް ވިދާޅުވި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "އަދަދު" އިން ވަނީ މި ސަރުކާރުގައި އެޑިއުކޭޝަން މިނިސްޓްރީއަށް އައްޔަން ކުރި ސިޔާސީ މުވައްޒަފުންގެ އަދަދު ހޯދުމަށް އެދިފަ އެވެ. އެ މިނިސްޓްރީން ފުރަތަމަ ބުނީ އެ މައުލޫމާތު ރައީސް އޮފީހުގެ ވެބްސައިޓުން ލިބެން ހުންނާނެ ކަމަށެވެ.
ނަމަވެސް އައިކޮމްއަށް މައްސަލަ ހުށަހަޅައި އެ މައްސަލައިގެ އަޑުއެހުމެއް ތާވަލުކުރުމާއެކު އެޑިއުކޭޝަނުން ވަނީ މައުލޫމާތު ދެވެން ނެތް ކަމަށް ބުނެފަ އެވެ.