ރައީސް އަބްދުﷲ ޔާމީނާއި ޓޫރިޒަމް މިނިސްޓަރު އަހްމަދު އަދީބާއި ކޮމިޝަނަރު އޮފް ޕޮލިސް ހުސައިން ވަހީދަށް މަރުގެ އިންޒާރުދިން މައްސަލައެއް ފުލުހުން ތަހުގީގުކުރަން ފަށައިފި އެވެ.
މި ތިން ބޭފުޅުންނަށް މަރުގެ އިންޒާރު ދީފައިވަނީ ޔޫޓިއުބްގައި އާންމުކޮށްފައިވާ ވީޑިއޯއެއްގައި މޫނު ނިވާކޮށްގެން ހުރި މީހެކެވެ.
ފުލުހުން ބުނެފައިވާ އެމައްސަލަ ތަހުގީގު ކުރަން ފަށާފައިވާ ކަމަށާއި އެއްވެސް ފަރާތަކަށް މަރުގެ އިންޒާރު ދީފިނަމަ އެކަމަކީ ފުލުހުން ސީރިއަސް ގޮތެއްގައި ބަލާނެ ކަމެކެވެ.
ގައުމީ ދިދައިގެ ކުރިމަތީގައި މޫނު ނިވާކޮށްގެން ހުރެ އެމީހާ ބުނަނީ އޭނާ މުހާތަބު ކުރަނީ ދިވެހި ގައުމާ ކަމަށާއި އެގޮތް އިހްތިޔާރުކުރަން ޖެހުނީ އިތުރު ގޮތެއް ނެތުމުން ކަމަށެވެ. އަދި އެއީ އަނިޔާވެރިކަމާ ދެކޮޅަށް ދޭ ފަހުގެ އިންޒާރު ކަމަށްވެސް ބުނެ އެވެ.
ކުރީގެ ރައީސް މުހައްމަދު ނަޝީދާއި ކުރީގެ ޑިފެންސް މިނިސްޓަރު ކާނަލް ރިޓަޔާޑު މުހައްމަދު ނާޒިމަށް ސަރުކާރުން ހެދިގޮތަށް އަދާލަތު ޕާޓީގެ ރައީސް އައްޝައިހް އިމްރާން އަބްދުﷲ އަށް ހަދަން ދޫނުކުރާނެ ކަމަށާއި އިމްރާނު ނުހައްގުން ޖަލަށް ލައި ހުކުމް ކުރުމަށް ކުރަމުންދާ މަސައްކަތް މިހާރުން މިހާރަށް ހުއްޓާލުމަށްވެސް އެމީހާ ވަނީ ގޮވާލާފަ އެވެ.
ކޯޓުތަކުގައި މައްސަލަ ބަލަމުންދާ ފަނޑިޔާރުންނަށް ވެސް މި ވީޑިއޯގައި ވަނީ އިންޒާރުދީފައިވާއިރު ސޯޝަލް މީޑިޔާގައި ގިނަ ބަޔަކު އެ ވީޑިއޯއަކީ ސަރުކާރު އަޑީގައި އޮވެގެން ހަދައިގެން އުޅޭ ވީޑިއޯ އެއްކަމަށް ބުނެ ވާހަކަދައްކަމުން ކަން ފާހަގަކޮށްލެވެއެވެ.