ބަންގްލަދޭޝްގެ ސަރުކާރުން ކަނޑައަޅާފައިވާ ވަޒީފާގެ ކޯޓާއާ ދެކޮޅަށް ކޮލެޖް ދަރިވަރުން ކުރަމުންދާ މުޒާހަރާތަކުގައި އިސްކޮށް ހަރަކާތްތެރިވާ ދަރިވަރުންތަކެއް ފުލުހުން ބެލުމުގެ ދަށަށް ގެންގޮސްފައިވާ ކަމަށް ބޭރު މީޑިއާތަކުން ރިޕޯޓް ކޮށްފިއެވެ.
ދަރިވަރުން މުޒާހަރާ ކުރަމުންދަނީ ބަންގްލަދޭޝްގެ މިނިވަން ކަމަށް ކުރި ހަނގުރާމައިގައި ބައިވެރިވި އެގައުމުގެ ސިފައިންގެ އާއިލާތަކަށް ސަރުކާރުގެ ވަޒީފާތަކުގެ 30 ޕަސެންޓު ދޭންޖެހޭގޮތަށް ކަނޑައަޅާފައި އޮންނަ އޮތުމާ ދެކޮޅަށެވެ. އެގޮތަށް ކަނޑައަޅާފައި އޮތުމުން ކިޔަވައިގެން ނިކުންނަ ކުދިންނަށް ވަޒިފާ ހޯދުމުގައި ދަތިތަކާ ކުރިމަތިވެ އެކަމު ނުރުހުން ދަރިވަރުން އަންނަނީ ފާޅުކުރަމުންނެވެ.
ބޭރު މީޑިއާތަކުން ރިޕޯޓް ކޮށްފައިވާގޮތުގައި މުޒާހަރާތަކުގައި އިސްކޮށް ހަރަކާތްތެރިވި ތިން ދަރިވަރަކު ފުލުހުންގެ ބެލުމުގެ ދަށަށް ގެންގޮސްފައިވަނީ ހޮސްޕިޓަލުގައި އެޑްމިޓް ކޮށްގެން ފަރުވާދެމުންދަނިކޮށެވެ. އަދި އެ ދަރިވަރުން ފުލުހުންގެ ބެލުމުގެ ދަށަށް ގެންގޮސްފައިވަނީ ގަދަކަމުން ހޮސްޕިޓަލުން ޑިސްޗާޖު ކޮށްގެން ކަމަށްވެސް ރިޕޯޓް ކޮށްފައިވެއެވެ.
މި ތިން ދަރިވަރުން ފުލުހުންގެ ބެލުމުގެ ދަށަށް ގެންދިއުމާ ގުޅިގެން ބަންގްލަދޭޝްގެ ހޯމް މިނިސްޓަރު މީޑިއާތަކަށް ބުނެފައިވަނީ އެ ތިން ދަރިވަރުން ފުލުހުންގެ ބެލުމުގެ ދަށަށް ގެންގޮސްފައިވަނީ އެ ދަރިވެރިންގެ ރައްކާތެރިކަމަށްޓަކައި ކަމަށެވެ. އެގޮތުން އެމީހުންނަށް ބަޔަކު އިނޒާރުދީ ބިރުދައްކަމުންދާ ކަމަށް ބުނެފައިވާ ކަމަށާއި އެހެންކަމުން އެކަމާ ގުޅޭގޮތުން އެމީހުންނާ ސުވާލު ކުރަމުންދާކަމަށެވެ.
ބަންގްލަދޭޝްގެ މުޒާހަރާތައް މައިތިރިކުރުމަށް ސިފައިން އަދި ފުލުހުން އަންނަނީ ހަތިޔާރުގެ ބޭނުންވެސް ކުރަމުންނެވެ. އެގޮތުން މުޒާހަރާގެ ބައިވެރިންނަށް އަމާޒުކޮށް ބަޑިޖަހާފައިވާއިރު،. މިހާތަނަށް 150 އަށްވުރެ ގިނަ މީހުން މަރުވެފައިވާ ކަމަށް ރިޕޯޓް ކޮށްފައިވެއެވެ. މުޒާހަރާތަކާ ގުޅިގެން ބަންގްލަދޭޝްގެ ބައެއް ހިސާބުތަކުގައި ވަނީ މޮބައިލް އަދި އިންޓަނެޓްގެ ހިދުމަތްތައް ކަނޑާލާފައެވެ. އަދި ކާފިއުވެސް ވަނީ އިއުލާނު ކޮށްފައެވެ.