މިދިޔަ ބުދަ ދުވަހު ޕާކިސްތާނުން ރާއްޖެ އައި މީހަކު އެތެރެކުރި 2.12 ކިލޯގެ މަސްތުވާތަކެތި އަތުލައިގަނެ، އެ މައްސަލައާ ގުޅުންހުރި އިތުރު ދެ ދިވެއްސަކު ވެސް ހައްޔަރުކޮށްފި އެވެ.
ކަސްޓަމްސްއިން ބުނީއމަސްތުވާތަކެތި އެތެރެކުރަން މަސައްކަތްކުރީ އަބޫދާބީ މަގުން ރާއްޖެ އައި ޕާކިސްތާނު މީހެއް ކަމަށާއި މައްސަލަ ތަހުގީގުކުރަން މަސްތުވާތަކެއްޗާ އެކީ އޭނާ ފުލުހުންނާ ހަވާލުކޮށްފައިވާ ކަމަށެވެ. އަދި އެ ތަހުލީލުގެ ފުރަތަމަ މަރުހަލާގައި މަސްތުވާތަކެތީގެ ބާވަތެއް ކަމަށްވާ ހެރޮއިން އަށް ޕޮޒިޓިވްވެފައިވާ ކަމަށާއި އޭގެ މަގުމަތީ އަގު 2،420،000ރ. އަރާ ކަމަށް ކަސްޓަމްސް އިން ބުންޏެވެ.
މިކަމާ ގުޅިގެން ފުލުހުން ބުނީ މި މައްސަލައާ ގުޅިގެން ފުލުހުން ހިންގި ކޮންޓްރޯލް ޑެލިވަރީ އޮޕަރޭޝަންގައި ހައްޔަރުކުރީ 25 އަހަރުގެފިރިހެނަކާއި، 40 އަހަރުގެ ފިރިހެނެއް ކަމަށެވެ.
ތިން މީހުންގެ ބަންދަށް ކްރިމިނަލް ކޯޓުން ވަނީ 15 ދުވަސް ޖަހައިފަ އެވެ.
ފުލުހުން ބުނީ މި މައްސަލައާ ގުޅޭ އިތުރު ބަޔަކު ތިބިކަމަށް ތަހުގީގަށް ފާހަގަ ކުރެވިފައިވާތީ އެ މީހުން ދެނެގަތުމުގެ މަސައްކަތް ކުރަމުން އަންނަ ކަމަށެވެ.