އިޒްރޭލުން ފަލަސްތީނުގެ ގާޒާގެ ސްކޫލަކަށް ބޮން އަޅައި 30 މީހަކު ޝަހީދުކޮށްލައިފި އެވެ.
ގާޒާގެ މެދުތެރޭގައި ހުންނަ ހަދީޖާ ސްކޫލަށް އިޒްރޭލުން ދިން މި ހަމަލާގައި 100 އަށް ވުރެ ގިނަ މީހުންނަށް އެކިވަރުގެ އަނިޔާތައް ލިބިފައިވާއިރު، މި ސްކޫލަކީ ހަނގުރާމައިގެ ސަބަބުން ހާލުގައި ޖެހިފައިވާ މީހުން ތިބުމަށް ހާއްސަކޮށްފައިވާ ސްކޫލެކެވެ.
އިޒްރޭލު އަސްކަރިއްޔާ އިން ތުހުމަތު ކުރާ ގޮތުން މި ސްކޫލަކީ ހަމާސް ޖަމާއަތުން ހަމަލާތައް ރާވައި އަދި ހަތިޔާރު ރައްކާކުރަމުންދާ ސްކޫލެކެވެ.
މި ހަމަލާ ކުށްވެރިކޮށް ހަމާސް އިން ނެރުނު ބަޔާނެއްގައި ބުނީ ހަމަލާގައި ޝަހީދުވެފައިވަނީ ގެދޮރު ދޫކޮށް އައިސްފައިވާ މީހުންނާއި، ތަފާތު އެކި އަނިޔާތަކަށް ފަރުވާ ހޯދަމުންދިޔަ މީހުން ކަމަށާއި މީގެތެރެއިން ގިނައީ އަންހެނުންނާއި ކުޑަކުދިން ކަމަށެވެ.
ގާޒާގެ ހެލްތު މިނިސްޓްރީން ބުނީ އިޒްރޭލުން ދެމުންދާ ހަމަލާތަކުގައި މިއަދު ހެނދުނުން ފެށިގެން މިހާތަނަށް 53 މީހަކު ޝަހީދުވެ 189 މީހަކަށް އެކިވަރުގެ އަނިޔާތައް ލިބިފައިވާ ކަމަށެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 39،000 އަށް ވުރެ މައްޗަށް އަރާފަ އެވެ.