އަންނަ މަހު ބެލުންތެރިންނަށް ގެނެސްދޭން ނިންމާފައިވާ ފިލްމު "ކަމަނާ" ގެ އާ ޕޯސްޓަރެއް ދައްކާލައިފި އެވެ.
މި ފޯސްޓަރުގައި ފެންނަނީ ޔޫސުފް ޝަފީއު (ޔޫއްޕެ) އާއި އައިމިނަތު ރަޝްފާ (އާޝާ) އެވެ.
މަޝްހޫރު ބަތަލާ މަރިޔަމް އައްޒަ ޓައިޓްލް ރޯލު ކުޅެފައިވާ "ކަމަނާ" ގައި އާޝާ ފެނިގެން ދާނީ ނެގަޓިވް ރޯލަކުންނެވެ. އެގޮތުން ފިލްމުގެ ޓްރެއިލާ އިން ފެންނަ ގޮތުގައި އާޝާ ނޯރާ) އަކީ، ކައިިވެނިން ބޭރުން ޔޫއްޕެ (ހައިދަރު) ލޯބީގެ ގުޅުމެއް ބާއްވާ މީހެކެވެ. އަދި "ކަމަނާ" އިން ނޯރާ އާއި މުހައްމަދު (ދަރާ) ރަޝީދު (އައްބާސް) ގެ ހައިރާން ކުރުވަނިވި ގުޅުމެއް ވެސް ފެނިގެން ދާނެ އެވެ.
މިއީ ބޭވަތާތެރި ފިރިއެއްގެ ފަރާތުން މާބަނޑު އަންހެނަކަށް ކުރިމަތިވާ ހަގީގީ ހާދިސާތަކެއްގެ މައްޗަށް ބިނާކޮށް ހަދާފައިވާ މި ފިލްމަކީ މަހުދީ އަހުމަދުގެ ސްކްރީންޕްލޭއަކަށް ހުސައިން މުނައްވަރު ޑައިރެކްޓްކޮށްފައިވާ ފިލްމެކެވެ.
އަންނަ މަހުގެ 27 ގައި އޮލިމްޕަގުގައި ޕްރީމިއާކުރަން ނިންމާފައިވާ "ކަމަނާ" އަކީ މިދިޔަ އަހަރުގެ "ލޯބިވެވިއްޖެ" ގެ ޕްރޮޑިއުސަރު އަލީ ޝާނީޒްގެ ސެޓާން ސްޓޫޑިއޯ އާއި ހުސައިންގެ ކިޑް ޕްރޮޑަކްޝަން ގުޅިގެން ގެނެސްދޭ ފިލްމެކެވެ.