ބެލުންތެރިންގެ ވަރަށް ބޮޑު މަގުބޫލު ކަމެއް ހޯދި "ސީތާ ރަމަން" ފަދަ ކާމިޔާބު އެތައް ފިލްމެއް ކުޅެފައިވާ އިންޑިއާގެ ދެކުނު މަޝްހޫރު އެކްޓަރު ދަލްގޫރް ސަލްމާން އުފަން ދުވަސް ފާހަގަކުރަން ރާއްޖެ އަތުވެއްޖެ އެވެ.
މިއަދު 40 އަހަރު ފުރުނު އެކްޓަރު އަންހެނުންނާއި ދަރިފުޅާ އެކީ އޭނަ ރާއްޖެ އައީ މިއަދު އެވެ. ދަލްގޫރް ރާއްޖެ އައީ ސްރީ ލަންކަން އެއާލައިންސް އިންނެވެ. އެ އެއާލައިންސްގެ ސޯޝަލް މީޑިއާ އެކައުންޓްތަކުގައި ކްރޫންތަކެއް ދަލްގޫރާ އެކީ ނަގާފައިވާ ފޮޓޯތަކެއް ހިއްސާކޮށްފައިވެ އެވެ.
ދަލްގޫރް އެންމެ ފަހުން ވަރުގަދަ ރޯލަކުން ފެނިފައި ވަނީ މިދިޔަ އަހަރު ރިލިޒްކުރި މަލަޔާޅަމް ފިލްމު "ކިންގް އޮފް ކޯތާ" އިންނެވެ. މިދިޔަ މަހު ރިލީޒްކުރި ޕްރަބާސް އާއި ދީޕިކާ ޕަދްކޯންގެ "ކަލްކީ: 2898 އޭޑީ" ގެ ވަރަށް ހާއްސަ ފެނިލުމެއްގައި ދަލްގޫރް ހިމެނޭ އިރު، އޭނަގެ ކުރިއަށް އޮތް ފިލްމަކީ ސެޕްޓެމްބަރު 7 އަށް ތާވަލުކޮށްފައި އޮތް "ލަކީ ބާސްކަރް" އެވެ.
ދަލްގޫރަކީ މަޝްހޫރު މަލަޔާޅަމް އެކްޓަރު މަމޫޓީގެ ދަރިއެކެވެ.
އޭނަ ބޮލީވުޑްގެ ފިލްމުތަކެއް ވެސް ކުޅެފައިވެ އެވެ. އޭގެ ތެރޭގައި ސޯނަމް ކަޕޫރްގެ "ދަ ޒޯޔާ ފެކްޓާ" އާއި ކުރީގެ އެކްޓަރު އިރުފާން ޚާންގެ "ކާރްވާން" ގެ އިތުރުން ސަނީ ޑިއޯލްގެ "ޗުޕް: ރިވެންޖް އޮފް ދި އާޓިސްޓް" ހިމެނެ އެވެ.