ރާއްޖޭގެ ތައުލީމީ ނިޒާމުގައި ހަމައެކަނި ދިވެހި ޓީޗަރުން ގޮތަށް ހެދުމުގެ ބޮޑު މަޝްރޫއެއް ފަށަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އިއްޔެ ރޭ ބޭއްވި 59 ވަނަ މިނިވަން ދުވަހުގެ ރަސްމީ ޖަލްސާގައި އެ މަނިކުފާނު ވިދާޅުވީ ދިވެހި ޓީޗަރުން ބިނާކުރަން ފަށާ ބޮޑު މަޝްރޫއު އަންނަ ސެޕްޓެމްބަރު މަހު ފައްޓަވާނެކަމަށެވެ.
ރައީސް ވިދާޅުވި ގޮތުގައި ތައުލީމީ ދާއިރާ ކުރިއެރުވުމަށްޓަކައި ކުރަންހުރި ކަންކަމަށް މިހާތަނަށް 9 މިލިޔަން ޑޮލަރު ހިލޭ އެހީގެ ގޮތުގައި ލިބިފައިވެ އެވެ. އެހެންވެ އޭގެ ދަށުން ދިވެހި ޓީޗަރުން ބިނާކުރަން ގިނަ މަސައްކަތްތަކެއް ކުރެވޭނެ ކަމަށެވެ
"އޭގެ ދަށުން ގިނަ ކަންތައްތަކެއް ކުރެވިގެން ދާނެ." ރައީސް ވިދާޅުވިި އެވެ.
ރާއްޖޭގެ ޓީޗަރުން މަދުވުގެ ސަބަބުން ގިނަ އަދަދެއްގެ ބިދޭސީން ޓީޗަރުން ގެންނަން ޖެހެ އެވެ. އެގޮތުން މިކަން މިގޮތަށް ހިނގާތާ އެތައް އަހަރެއްވެފައިވާ އިރު، ސަރުކާރުން ބުނެފައިވާ ގޮތުގައި ޓީޗަރުންނަށް ވާން ބޭނުންވާ މީހުން ވެސް މިހާރު ދަނީ މަދުވަމުންނެވެ.