އެމެރިކާގެ ރައީސް ކަމަށް ޑިމޮކްރެޓިކް ޕާޓީގެ ފަރާތުން ވާދަކުރައްވާ ކެންޑިޑޭޓް އަދި މިހާރުގެ ނައިބު ރައީސް ކަމަލާ ހެރިސްގެ ރަނިންމޭޓް އަންނަ މަހުގެ 7 ގައި އިއުލާން ކުރާނެ ކަމަށް ރިޕޯޓްތައް ބުނެފި އެވެ.
އެ ކަމަނާގެ ރަނިންމޭޓަކަށް ވާނީ ކާުކުތޯ ބަލަން ވަރަށް ގިނަ ބަޔަކު މިހާރު ތިބީ އިންތިޒާރުގަ އެވެ. ނަމަވެސް ރަނިންމޭޓާ ގުޅޭ އެއްވެސް ވާހަކައެއް ކަމާނާގެ ކެމްޕޭން ޓީމުން އަދި ރަސްމީކޮށް ނުދައްކަ އެވެ.
އެކަމަކު މީޑިއާތަކުން ބުނީ އަންނަ މަހުގެ 7 ގައި ބާއްވާ ހާއްސަ ކެމްޕޭން އިވެންޓެއްގައި ރަނިންމޭޓް އިއުލާން ކުރަން ތައްޔާރީތައްވަމުން އަންނަ ކަމަށެވެ.
ރައީސްކަމަށް ކެމްޕޭން ކުރެއްވުމަށް ފަހު، މިހާރުގެ ރައީސް ޖޯ ބައިޑެން ރިޔާސީ ރޭސް ދޫކުރައްވައި ކަމާލާއާ ޓިކެޓް ޓިކެޓް ހަވާލުކުރެއްވުމާ އެކީ ރަނިންމޭޓްގެ ވާހަކަ އަންނަނީ މީޑިއާތަކުގައި ވަރަށް ހޫނުކޮށް ދެކެވެމުންނެވެ. އެގޮތުން މިހާރު ރަނިންމޭޓަކަށް ބޭފުޅުންތަކެއް ޝޯޓްލިސްޓްކޮށްފައިވާ ކަމަށް މީޑިއާތަކުން ބުނެ އެވެ.
އޭގެ ތެރޭގައި އެރިޒޯނާގެ ސެނެޓަރު މާކް ކެލީ، ޕެންސިލްވީނިއާގެ ގަވަރުނަރު ޖޯޝް ޝަޕީރޯ، ކެންޓަކީގެ ގަވަރުނަރު އެންޑީ ބެޝެއާ އަދި ކުރީގެ އެޑްމިރަލް ވިލިއަމް މެކް ރެވެން ހިމެނެ އެވެ.
ނޮވެމްބަރުގައި ބާއްވާ އިންތިހާބުގައި ރިޕަބްލިކަން ޕާޓީގެ ފަރާތުން ވާދަކުރައްވާ ޑޮނަލްޑް ޓްރަމްޕްގެ ރަނިންމޭޓަކީ ޖޭޑީ ވޭންސް އެވެ.