ރާއްޖޭގައި މިހާރު ގެސްޓް ހައުސްތަކުގެ ބެޑް ކެޕޭސިޓީ އަށް 14،000 އިން މައްޗަށް އަރާފައިވާ ކަމަށް ޓޫރިޒަމް މިނިސްޓްރީން ބުނެފި އެވެ.
އެ މިނިސްޓްރީން އާންމުކުރި އެންމެ ފަހުގެ ތަފާސްހިސާބުތައް ދައްކާ ގޮތުން މި މަހުގެ 23 އާ ހަމައަށް 867 ގެސްޓް ހައުސްއަކުން 14،615 އެނދު އޮޕަރޭޝަނަށް ގެނެސްފައިވެ އެވެ. މި އަހަރު ފެށުނު އިރު ގެސްޓްހައުސްތަކުގެ ބެޑް ކެޕޭސިޓީ ހުރީ 13،657 ގަ އެވެ. އެއީ 809 ގެސްޓްހައުސްއަކުންނެވެ.
ނަމަވެސް ފާއިތު ހަތް މަހުގެ ތެރޭގައި އަލަށް 958 އެނދު އިތުރުވެފައިވާ ކަމަށް މިނިސްޓްރީން ބުންޏެވެ.
ރާއްޖޭގެ އިގުތިސާދު ޓޫރިޒަމަށް ބިނާވެފައިވާ އިރު، މުޅި ރާއްޖޭގައި ގެސްޓްހައުސް ވިޔަފާރި އަންނަނީ ވަރަށް ބޮޑަށް ފުޅާވަމުންނެވެ.
މިހާރު ރާއްޖޭގެ ޖުމްލަ ބެޑް ކެޕޭސިޓީ އަކީ 62،481 އެވެ. އޭގެ ތެރޭގައި ހިމެނެނީ ރިސޯޓުތަކުގެ 42،955 އެނދާއި ގެސްޓް ހައުސްތަކުގެ 14،615 އެނދާއި ސަފާރީތަކުން 2،955 އެނދުގެ އިތުރުން ހޮޓާތަކުން 1،956 އެނދެވެ. ރާއްޖޭގައި ހިންގާ ރިސޯޓްތަކުގެ އަދަދު މިހާރު 174 އަށް އަރަ އެވެ. އަދި 867 ގެސްޓު ހައުސް ހިންގަމުން އަންނަ އިރު، ސަފާރީތަކުގެ އަދަދު 152 އަށް އަރަ އެވެ. މީގެ އިތުރުން ހޮޓާތަކުގެ އަދަދު 1،207 އަށް އަރަ އެވެ.