މީހަކަށް ވަޅިން ބިރުދައްކާ އޮރިޔާންކޮށް 45،000 ރުފިޔާ ފޭރުނު މައްސަލައިގައި ދެ މީހަކު ހައްޔަރުކޮށް ބަންދު މުއްދަތު ޖަހައިފިއެވެ.
މި މައްސަލައިގައި ހައްޔަރުކޮށް ބަންދު މުއްދަތު ޖަހާފައިވަނީ 26 އަހަރު އަދި 35 އަހަރުގެ ދިވެހި ފިރިހެނަކަށެވެ. 26 އަހަރުގެ މީހާގެ ބަންދަށް ކްރިމިނަލް ކޯޓުން ވަނީ 60 ދުވަސް ދީފައެވެ. އަދި 35 އަހަރުގެ މީހާގެ ބަންދަށް ވަނީ 30 ދުވަހުގެ މުއްދަތެއް ދީފައެވެ.
މި މީހުންގެ ބަންދު އަމުރުގައި ބުނެފައިވަނީ، މި މައްސަލައިގައި އަނިޔާ ލިބުނު މީހާ މއ. މަސްފަންގެއަށް ވެއްދި ކަމަށް ބެލެވެނީ އަންހެނެއް ކަމަށެވެ. މައްސަލައިގައި އަނިޔާލިބުނު މީހާ މއ. މަސްފަންގެއަށް ވަނުމުން އިތުރު ދެ ފިރިހެނުން އޭނާ ހިފަހައްޓާ ބަންދުކޮށް، އޭނާއަށް ވަޅިއަކުން ބިރުދައްކާ، އޮރިޔާންކޮށް، އަނިޔާކޮށް، އޭނާގެ ފޯނުއަތުލައި އޭނާގެ އެކައުންޓުން އެހެން އެކައުންޓަކަށް 20،000 ރުފިޔާ ފޮނުވާފައިވާ ކަމަށެވެ. އަދި އަނިޔާ ލިބުނު މީހާގެ ކާޑު ބޭނުންކޮށްގެން އޭޓީއެމްއިން 25،000 ރުފިޔާ ނަގާފައިވާ ކަމަށެވެ.
ބަންދު އަމުރުގައި ބުނެފައިވަނީ މި މައްސަލައިގައި ހިމެނޭ މއ. މަސްފަންގެއަކީ ތަކުރާރުކޮށް އެކި ބޭނުންތަކަށް މީހުން އެގެއަށް ވެއްދުމަށްފަހު ބިރުދައްކާ ފޭރުމުގެ ރެކޯޑް އޮތް ތަނެއް ކަމަށެވެ. އަދި މައްސަލައިގައި ހިމެނޭ ކުށް ކުރުމުގައި ޝާމިލުވަނީ މަންމައަކާއި ދަރިއެއް ކަމަށް ގިނަ ހައްޔަރު އަދި ބަންދު ލޮގުތަކުން ސާފުވާ ކަމަށެވެ.