މާލޭގެ ގެޔަކަށް މީހަކު ވައްދާ ފޭރުނު މައްސަލައިގައި އަންހެނަކުވެސް ހައްޔަރު ކޮށްފިއެވެ.
ފުލުހުން އިއްޔެ ބުނެފައިވަނީ ޖުލައި 24 ވަނަ ދުވަހު މާލޭގެ ގެޔަކަށް މީހަކު ވައްދާ ވަޅިން ބިރުދައްކާ އޮރިޔާންކޮށް ފައިސާ ފޭރުނު މައްސަލައެއްގައި ދެ ފިރިހެނަކު ހައްޔަރު ކޮށްފައިވާ ކަމަށެވެ. މި މައްސަލައިގައި ހައްޔަރުކޮށް ބަންދު މުއްދަތު ޖަހާފައިވަނީ 26 އަހަރު އަދި 35 އަހަރުގެ ދިވެހި ފިރިހެނަކަށެވެ. 26 އަހަރުގެ މީހާގެ ބަންދަށް ކްރިމިނަލް ކޯޓުން ވަނީ 60 ދުވަސް ދީފައެވެ. އަދި 35 އަހަރުގެ މީހާގެ ބަންދަށް ވަނީ 30 ދުވަހުގެ މުއްދަތެއް ދީފައެވެ.
ފުލުހުން މިއަދު ބުނެފައިވަނީ މި މައްސަލައާ ގުޅިގެން ހޯދަމުންދިޔަ އުމުރުން 43 އަހަރުގެ ދިވެހި އަންހެން މީހާ ހައްޔަރު ކޮށްފައިވާ ކަމަށެވެ. އަދި އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ތަހުގީގު ނިމެންދެން ބަންދު ކުރުމަށް އަމުރު ކޮށްފައިވާ ކަމަށްވެސް ފުލުހުން މައުލޫމާތު ދީފައިވެއެވެ.
މި މައްސަލައިގައި ހައްޔަރުކުރި ދެ ފިރިހެނުންގެ ބަންދު އަމުރުގައި ބުނެފައިވަނީ، މި މައްސަލައިގައި އަނިޔާ ލިބުނު މީހާ މއ. މަސްފަންގެއަށް ވެއްދި ކަމަށް ބެލެވެނީ އަންހެނެއް ކަމަށެވެ. މއ. މަސްފަންގެއަކީ ތަކުރާރުކޮށް އެކި ބޭނުންތަކަށް މީހުން އެގެއަށް ވެއްދުމަށްފަހު ބިރުދައްކާ ފޭރުމުގެ ރެކޯޑް އޮތް ތަނެއް ކަމަށްވެސް ބަންދު އަމުރުގައި ބުނެފައިވެއެވެ.
މައްސަލައިގައި އަނިޔާލިބުނު މީހާ މއ. މަސްފަންގެއަށް ވަނުމުން އިތުރު ދެ ފިރިހެނުން އޭނާ ހިފަހައްޓާ ބަންދުކޮށް، އޭނާއަށް ވަޅިއަކުން ބިރުދައްކާ، އޮރިޔާންކޮށް، އަނިޔާކޮށް، އޭނާގެ ފޯނުއަތުލައި އޭނާގެ އެކައުންޓުން އެހެން އެކައުންޓަކަށް 20،000 ރުފިޔާ ފޮނުވާފައިވާ ކަމަށާއި އަދި އަނިޔާ ލިބުނު މީހާގެ ކާޑު ބޭނުންކޮށްގެން އޭޓީއެމްއިން 25،000 ރުފިޔާ ނަގާފައިވާ ކަމަށްވެސް ބަންދު އަމުރުގައި ބުނެފައިވެއެވެ.