ރައްޔިތުންގެ މަޖިލީހުގެ މެންބަރުންގެ އަދަދު ވަކިވަރެއްގައި ހިފެހެއްޓުމަށް ތާއީދުކުރާކަން މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ހާމަކޮށްފިއެވެ.
ރައްޔިތުންގެ މަޖިލީހުގެ މެންބަރުންގެ އަދަދު ކޮންމެ 5 އަހަރަކުން އިތުރުވަމުންދާ ދިއުމާމެދު މެންބަރުންގެ ހިޔާލު ހޯދުމަށް ހުށަހަޅާފައިވާ ގަރާރަށް ބައެއް ސިޔާސީ ޕާޓީތަކުގެ މަޝްވަރާ ހޯދުމަށް މިއަދު ވަނީ މަޖިލީހުގެ މިނިވަން މުއައްސަސާތަކުގެ ކޮމިޓީގެ ބައްދަލުވުމެއް ބާއްވާފައެވެ. އެގޮތުން މި ކޮމިޓީގެ ބައްދަލުވުމަށް ވަނީ ވެރިކަންކުރާ ޕީޕީއެމް ޕީއެންސީ އަދި އިދިކޮޅު އެމްޑީޕީގެ މަޝްވަރާ ހޯދުމަށް އެ ޕާޓީތަކުގެ ބޭފުޅުން ހާޒިރުކޮށްފައެވެ.
މި ކޮމިޓީގައި އެމްޑީޕީގެ ފަރާތުން ވާހަކަ ދައްކަވަމުން އެމްޑީޕީގެ ތަރުޖަމާން އަނަސް އަބަދުއްސައްތާރް ވިދާޅުވީ، ދައުލަތުގެ ތިން ބާރުގެ ތެރެއިން ޤާނޫނު ހަދާ ބާރަށް އިންތިހާބު ކުރަން ޖެހޭ މެންބަރުން އިންތިހާބު ކުރާނެ ގޮތްތަކެއް ކަނޑައެޅުމުގެ ވާހަކަ ދައްކާއިރު މިކަމަކީ ފުޅާ ދާއިރާއެއްގައި މަޝްވަރާ ކުރެވިގެން ކުރަންޖެހޭ ކަމެއް ކަމަށެވެ.
މިއަދުގެ ކޮމިޓީ ބައްދަލުވުމުގައި އެމްޑީޕީގެ ލީގަލް ޑިރެކްޓަރު މަހްފޫޒް ސައީދު ވިދާޅުވީ، ރައްޔިތުންގެ މަޖިލީހުގެ މެންބަރުންގެ އަދަދު ވަކި ވަރެއްގައި ހިފެހެއްޓިފައި އޮތުމަށް ތާއީދު ކުރެވޭ ކަމަށެވެ. އަދި ބޮޑަށް ރަނގަޅީ ވެސް ގާނޫނުއަސާސީގައި ވަކި އަދަދެއް ކަނޑައެޅިފައި އޮތުން ކަމަށްވެސް މަހުފޫޒް ވިދާޅުވިއެވެ.
އެމްޑީޕީން މިއަދުގެ ކޮމިޓީ ބައްދަލުވުމުގައި ބުނެފައިވަނީ މި މައްސަލައިގައި އެ ޕާޓީން ދެކޭގޮތް ފުޅާ ދާއިރާއެއްގައި މަޝްވަރާ ކުރުމަށްފަހު ހުށަހަޅާނެ ކަމަށެވެ.