ޕޮލިސް ކޮމިޝަނަރު އަލީ ޝުޖާއު ލ. އަތޮޅަށް ރަސްމީ ދަތުރެއް ފައްޓަވައިފި އެވެ.
މިއަދު ފެއްޓެވި މި ދަތުރުގައި ސީޕީގެ އަރިހުގައި، ޑެޕިއުޓީ ކޮމިޝަނަ އޮފް ޕޮލިސް ފަރުހާދު ފިކުރީ އާއި، އެސިސްޓެންޓް ކޮމިޝަނަ އޮފް ޕޮލިސް އަހުމަދު ޝިފާން އާއި އެސިސްޓެންޓް ކޮމިޝަނަ އޮފް ޕޮލިސް މޫސާ އަލީ، ސައުތު ސެންޓްރަލް ރީޖަން ކޮމާންޑަރ ޗީފް ސުޕްރިންޓެންޑެންޓް އޮފް ޕޮލިސް އަޙްމަދު އަޒްހާން އަދި ފުލުހުންގެ އެގްޒެކެޓިވް ބައެއް އޮފިސަރުންނާއި ކޮމިޝަންޑު އޮފިސަރުން ބައިވެރިވެވަޑައިގަނެ އެވެ. ވައެވެ.
މި މަހު 30 އާ ހަމައަށް ކުރިއަށް ގެންދާ މި ދަތުރުގައި، ލ. އަތޮޅުގެ ބައެއް ރަށްރަށުގެ ކައުންސިލުތަކާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީތައް އަދި އެ ރަށްރަށުގައި މަސައްކަތްކުރާ ފުލުހުންނާ ބައްދަލު ކުރަން ހަނަޖެހިފައިވެ އެވެ.
އެގޮތުން މިއަދު ވަނީ ލ. އަތޮޅު ކައުންސިލުގެ މެންބަރުންނާ ބައްދަލުކޮށްފަ އެވެ. މި ބައްދަލުވުމުގައި، އަތޮޅުގެ ތަރައްގީ އާއި ރަށްރަށުގެ ކުށުގެ ހާލަތު ދެނެގަނެ ރައްޔިތުންގެ ކަންބޮޑުވުންތަކަށް ހައްލު ހޯދުމަށާއި، ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށާއި މުޖުތަމައުގެ ބައިވެރިވުން އިތުރުކުރުމަށް ކުރެވިދާނެ ކަންކަމާ ގުޅޭ ގޮތުން މަޝްވަރާކޮށްފައިވެ އެވެ.
މީގެ އިތުރުން ހައްދުންމަތީގެ ފުލުުހުންނާ ވެސް ސީޕީގެ ޓީމު ބައްދަލުކުރައްވައި، ރައްޔިތުންނާ ގުޅިގެން ފުލުހުންގެ މަސައްކަތްތައް ކުރިއަށް ގެންދާ ގޮތް އޮޅުން ފިލުއްވައި އަދި ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި އިތުރަށް ކުރެވިދާނެ ކަންކަމާ ގުޅޭ ގޮތުން މަޝްވަރާ ކުރަން ހަމަޖެހިފައިވެ އެވެ.