މިފްކޯގެ ޕްރޮސެސިން ކެޕޭސިޓީ އިތުރު ކުރެވުމުން މަސް ބޭރުކޮށްގެން ރާއްޖެއަށް ލިބޭ އާމްދަނީ 190 މިލިއަން ޑޮލަރަށް އިތުރު ކުރެވޭނެ ކަމަށް ފިޝަރީޒް މިނިސްޓަރު އަޙުމަދު ޝިޔާމް ވިދާޅުވެއްޖެ އެވެ.
އެސްއެސް ޓީވީގައި މިނިސްޓަރު ރޭ ވިދާޅުވީމި ފްކޯގެ ކެޕޭސިޓީ އިތުރުކުރުމުގެ މަސައްކަތް ކުރަމުން އަންނަ ކަމަށެވެ،. އެގޮތުން ޅ. ފެލިވަރާއި ފ. ނިލަންދޫގެ އިތުރުން ގދ. ފިޔޯރީގައި މަސް ބަންދު ކުރާ ފެކްޓްރީތައް ގާއިމުކުރުމުގެ މަސައްކަތްތައް ކުރަމުން އަންނަ ކަމަށް ވިދާޅުވި އެވެ.
ޝިޔާމު ވިދާޅުވީ، މިހާރު މިފްކޯގައި ހުރީ 40 މެޓްރިކްޓަނުގެ ޕްރޮސެސިން ކެޕޭސިޓީއެއް ކަމަށާއި އެ ފެކްޓަރީތައް އޮޕަރޭޝަނަލައިޒް ކުރެވުމުން، މިފްކޯގެ ޕްރޮސެސިން ކެޕޭސިޓީ 300 މެޓްރިކްޓަނަށް ބަދަލުވާނެ ކަމަށެވެ.
"އެ ފެކްޓްރީތަކުން އިތުރުކުރެވޭ ކެޕެސިޓީއާ އެކު ގާތްގަނޑަކަށް އަށްޑިހަ އެއްހާސް މެޓްރިކްޓަނުގެ މަސް ބަންދު ކުރެވޭނެ ކަމަށް ގަބޫލު ކުރެވޭ." މިނިސްޓަރު ވިދާޅުވި އެވެ.
ޝިޔާމު ފާހަގަ ކުރެއްވި ގޮތުގައި ރާއްޖެއިން މިހާރު 128،000 ނުވަތަ 130،000 މެޓްރިކްޓަނުގެ މަސް ބާނާ އެވެ. އަދި އެ ހުރިހާ މަހެއް ޕްރޮސެސްކުރެވޭ ނަމަ މަސް ބޭރުކޮށްގެން މިހާރު ލިބޭ 90 މިލިއަން ޑޮލަރު 180-190 މިލިއަން ޑޮލަރަށް އިތުރުކުރެވޭނެ ކަމަށް ވިދާޅުވި އެވެ.
ވަޒީރު ލަފާކުރައްވާ ގޮތުގައި މިފްކޯގެ ޕްރޮސެސިން ކެޕޭސިޓީ އިތުރުކުރަން ދޮޅު އަހަރެއްހާ ދުވަސް ނަގާނެ ކަމަށެވެ.