ރާއްޖޭގެ ގުދުރަތީ ވެށީގެ ޗާޓްތަކެއް އެކުލަވާލުމަށް ގްރޫޕް އޮފް އާތް އޮބްޒަވޭޝަންސްއާއެކު އެއްބަސްވުމެއްގައި ސޮއިކޮށްފި އެވެ.
"ދަ ގްލޯބަލް އިކޯސިސްޓަމް އެޓްލަސް އެކްސެލެރޭޓަ ފޮ ދަ މޯލްޑިވްސް" ގެ ނަން ދެވިފައިވާ މި މަޝްރޫއުގެ ދަށުން ރާއްޖޭގައި މުޅިން އަލަށް އިކޯސިސްޓަމް އެޓްލަސްއެއް އެކުލަވައިލެވޭނެ އެވެ.
މީގެ ދަށުން އެކުލަވާލެވޭ އެޓްލަސްގައި ރާއްޖޭގެ ތިމާވެށީގެ ވައްޓަފާޅިތަކުގެ ބާވަތްތަކާއި، އެ ސަރަހައްދުތަކުގެ މައުލޫމާތު އަދި ފަންނީ ލިޔެކިޔުންތައް ހިމެނޭނެ ކަމަށް އެންވަޔަރަމެންޓް މިނިސްޓްރީން ބުނެ އެވެ. އަދި މަޝްރޫއު ކުރިއަށް ގެންދާނީ ޔޫއެސް އެއިޑްގެ އެހީގައި ރީޖެނެރޭޓް ޕްރޮޖެކްޓްގެ ދަށުން އައިޔޫސީއެންއާ ގުޅިގެން ކުރިން ދެނެގަނެފައިވާ ރާއްޖޭގެ ތިމާވެށީގެ ވައްޓަފާޅިތަކުގެ މައްޗަށް ބިނާކޮށެވެ.
އެއްބަސްވުމުގައި ސޮއިކުރުމުގެ ރަސްމިއްޔާތުގައި އެންވަޔަރަމެންޓް މިނިސްޓަރު ތޯރިގް އިބްރާހިމް ވަނީ މި މަޝްރޫއު ފުރަތަމަ ފަށާ ގައުމެއްގެ ގޮތުގައި ރާއްޖެ ހޮވިކަމަށްޓަކައި ޖީއީއޯ އަށް ޝުކުރު ވެސް އަދާކުރައްވައިފަ އެވެ. އަދި މި މަޝްރޫއު އިން ފައިދާހުރި ގޮތެއްގައި މަސައްކަތްކުރެވޭނެ ކަމުގެ އުންމީދު މިނިސްޓަރު ފާޅުކުރެއްވި އެވެ.