މިދިޔަ އަހަރުގެ ސެޕްޓެމްބަރު މަހުގެ ތެރޭގައި ތޫފާނަކާ ގުޅިގެން މޫސުން ވަރަށް ބޮޑަށް ގޯސްވެ، ގަދަ ވިއްސާރައާ އެކީ ޑޭމްތަކެއް ފަޅައިގެން ގޮސް ލީބިއާގެ ފެންބޮޑުވި ހާދިސާއާ ގުޅިގެން، ދައުވާކުރި މީހުންގެ ތެރެއިން 12 މީހަކު ޖަލަށް ލާން ހުކުމްކޮށްފި އެވެ.
ފެންބޮޑުވެ 5،000 އަށް ވުރެ ގިނަ މީހުން މަރުވި ހާދިސާއާ ގުޅިގެން ޖަލަށް ލާން ހުކުމްކުރި މީހުންނަށް އިއްވީ 9-27 އަހަރާ ދެމެދުގެ ޖަލު ހުކުމްތަކެވެ. އެ މީހުންގެ މައްޗަށް ކޮށްފައި ވަނީ އިހުމާލުވުމާއި ބައެއްގެ ފުރާނަ ގެއްލިދާނެ ފަދަ ގޮތަކަށް ގަސްތުގައި އަމަލު ކުރުމާއި ދައުލަތުގެ ފައިސާ ބޭކާރު ގޮތުގައި ހޭދަކުރިކަމުގެ ދައުވާ އެވެ.
ޖަލު ހުކުމް އިއްވި މިހުންނަކީ ހަލާކުވި ޑޭމްތައް މަރާމާތުކޮށް ބެލެހެއްޓުމުގެ މަސައްކަތްތަކާ އިސްކޮށް ހަވާލުވެ ތިބި އޮފިޝަލުންނެވެ. އެގޮތުން 12 އޮފިޝަލަކަށް ޖަލު ހުކުމް އިއްވި އިރު، މައްސަލައާ ގުޅިގެން ދައުވާކުރި އިތުރު ތިން މީހަކު ނަހަމަ ގޮތުގައި ހޯދި ފައިސާތަކެއް އަނބުރާ ދައްކަން ހުކުމްކޮށްފައިވެ އެވެ. އަދި ދައުވާކުރި އިތުރު ހަތަރު މީހަކު ދައުވާތަކުން ސަލާމަތްވެފަިއވެ އެވެ.
މިދިޔަ އަހަރުގެ ސެޕްޓެމްބަރު މެދުތެރޭގައި ހިނގި ފެންބޮޑުވުމުގެ ހާދިސާގައި އެންމެ ބޮޑު ގެއްލުމެއްވީ ލީބިއާގެ ދަރުނާ ސިޓީއަށެވެ.
ޑޭމްތައް ފަޅައިގެން ދާން ދިމާވި މައިގަނޑު ސަބަބަކީ އެ ތަންތަން މަރާމާތު ނުކޮށް ގިނަ ދުވަސްވެ، ގެއްލުންތަކެއްވެފައި ހުރުމެވެ.