ޓައިގާ ޝްރޮފް ވަރުގަދަ އެކްޝަން ރޯލެއް ކުޅެމުން އަންނަ "ބާގީ" ފްރެންޗައިޒްގެ ހަތަރު ވަނަ ބައިގެ ޝޫޓިން މި އަހަރުގެ ފަހުކޮޅު ފަށަން ޕްލޭންކޮށްފައިވާ ކަމަށް ރިޕޯޓްތައް ބުނެފި އެެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ ސާޖިދު ނަދިއަދުވާލާ ޕްރޮޑިއުސްކުރާ ފިލްމުގެ ޝޫޓިން ފެށުމުގެ ތައްޔާރީތަކުގެ ތެރެއިން މިހާރު ޑައިރެކްޓަރަކު ހަމަޖައްސައި، ފިލްމުގެ ބަތަލާއަކު ވެސް ފައިނަލް ކުރުމުގެ ކަންކަން މިހާރު ކުރިއަށްދާ ކަމަށެވެ.
"ބާގީ 4" ހަދަން ނިންމިކަން އިއުލާންކުރީ އެމެޒޯން ޕްރައިމް ވީޑިއޯއާ ގުޅިގެން ގެނެސްދޭން ހުރި އިންޑިއާގެ އާ ކޮންޓެންޓްތައް އިއުލާންކުރަން މާޗް މަހުގެ ތެރޭގައި ބޭއްވި އިވެންޓްގަ އެވެ.
ދެހާސް ސޯޅައިގައި ގެނެސްދިން "ބާގީ" ގެ ފުރަތަމަ ބައި ޑައިރެކްޓްކުރީ ސަބީރް ޙާނެވެ. އަދި 2018 ގައި "ބާގީ 2" އާއި 2020 ގައި "ބާގީ 3" ގެ ޑައިރެކްޓްކުރީ އަހުމަދު ޚާނެވެ. "ބާގީ" އާއި "ބާގީ 3" ގެ ބަތަލާ އަކީ ޝްރަދާ ކަޕޫރެވެ. "ބާގީ 2" ގެ ބަތަލާ އަކީ ޑިޝާ ޕަޓާނީ އެވެ.
ޓައިގާގެ އެންމެ ފަހުގެ ފިލްމަކީ އެޕްރީލްގައި ރިލީޒްކުރި "ބަޅޭ މިޔާ ޗޯޓޭ މިޔާ" އެވެ.