ރާއްޖޭގެ ވަޒީފާގެ ބާޒާރުގައި ބިދޭސީން މަދުކޮށް، ދިވެހިން މަސައްކަތްތަކަށް އަހުލުވެރިކުރުވަން މަސައްކަތްކުރަން ޖެހޭ ކަމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ވިދާޅުވެއްޖެއެވެ.
ވަޒީފާއާބެހޭ ޤާނޫނަށް ހުށަހަޅާފައިވާ އިސްލާހަށް މިއަދުގެ ޖަލްސާގައި ވާހަކަ ދައްކަވަމުން މެންބަރު މުހައްމަދު އިބްރާހިމް ވިދާޅުވީ ވަޒީފާ އަދާކުރުމަށް އެއް ގައުމަކުން ބިދޭސީން ގެނެވޭ ލިމިޓް އުވާލުމަށް އިސްލާހު ހުށަހަޅާފައިވާތީ އެކަމާމެދު ކަންބޮޑުވާ ކަމަށެވެ. ދުނިޔޭގެ އެހެން ގައުމުތަކުގައިވެސް މިފަދަ ލިމިޓްތައް ކަނޑައަޅާފައިވާ ކަމަށާއި، ރާއްޖޭގައި ހައްދެއް ހުދޫދެއްނެތި އެއް ގައުމަކުން ބިދޭސީޏް ގެނެވޭގޮތަށް ހަދަން އުޅުމަކީ ކޮން މަގުސަދެއްގައި ކުރަން އުޅޭ ކަމެއްތޯ ސުވާލު އުފެދޭ ކަމަށް ވިދާޅުވިއެވެ.
މެންބަރު މުހައްމަދު އިބްރާހިމް ވިދާޅުވީ ރާއްޖޭގައި އެންމެ ފަހުން ހެދުނު ބޯހިމެނުމުން ދައްކާގޮތުން 132،000 އަށްވުރެ ގިނަ ބިދޭސީން ރާއްޖޭގައި ހަރަކާތްތެރިވާކަމަށެވެ. ރާއްޖޭގައި ވަޒީފާއެއް އަދާނުކުރާ އަދި އިތުރު ތައުލީމެއް ހާސިލު ނުކުރާ ނިސްބަތަކީ ޒުވާނުންގެ 19 އިންސައްތަ ކަމަށާއި ކޮންމެ ފަސް ޒުވާނެއްގެ ތެރެއިން އެއް ޒުވާނަކީ މަސައްކަތެއް ނުކުރާ އަދި މަތީތައުލީމެއް ނުހޯދާ މީހެއްކަންވެސް ފާހަގަ ކުރެއްވިއެވެ. އަދި ރާއްޖޭގެ ޒުވާނުންގެ އަބާދީގެ 25 އަހަރާއި 44 އަހަރާއި ދެމެދު އުމުރުފުރާގެ މީހުންގެ ތެރެއިން ފިރިހެނުނަށްވުރެއް ބިދޭސީން ގިނަ ކަމަށްވެސް މެންބަރު ވިދާޅުވިއެވެ.
"ތަފާސްހިސާބު ދައްކާ މަންޒަރު ވަރަށް ސާފު. މިއަދު މަސައްކަތް ކުރަންޖެހެނީ ބިދޭސީ މަސައްކަތްތެރިން މަދުކޮށް، ދިވެހިން މަސައްކަތްތަކަށް އަހުލުވެރި ކުރުވަން." މެންބަރު މުހައްމަދު އިބްރާހިމް ވިދާޅުވިއެވެ.
މެންބަރު މުހައްމަދު އިބްރާހިމް ވިދާޅުވީ މިހާރު ވަޒީފާއާބެހޭ ގާނޫނަށް ހުށަހަޅާފައިވާ އިސްލާހުން ދިވެހިން މަސައްކަތްތަކަށް އަހުލުވެރި ކުރުވުމުގެ މަގުސަދު ހާސިލުވޭތޯ ސުވާލު އުފެދޭ ކަމަށެވެ.