ވަޒީފާއާބެހޭ ޤާނޫނަށް ހުށަހަޅާފައިވާ އިސްލާހުގައި ބިދޭސީންނަށް އިހުމާލުވުމުން ޖޫރިމަނާގެ ގޮތުގައި ނެގުމަށް ކަނޑައަޅާފައިވާ 50،000 ރުފިޔާއަކީ ބޮޑު އަަދަދެއް ކަމަށް ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ ވިދާޅުވެއްޖެއެވެ.
ވަޒީފާއާބެހޭ ޤާނޫނަށް ހުށަހަޅާފައިވާ އިސްލާހަށް ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން މެންބަރު ސައުދުﷲ ވިދާޅުވީ ބިދޭސީންނަށް އިހުމާލުވުމުން ނަގާ ޖުރިމަނާގެ ގޮތުގައި 50،000 ރުފިޔާ މާ ބޮޑު ކަމަށެވެ. އަދި އެ އަދަދާމެދު ކޮމިޓީ މަރުހަލާގައި ވިސްނަންޖެހޭ ކަމަށެވެ.
"ފަސް މީހުންގެ ކަމެއް ދިމާވެއްޖެއްޔާ އެއީ 250،000 ރުފިޔާ ދައްކަން ޖެހުން ފަދަ ކަމެއް." ސައުދުﷲ ވިދާޅުވިއެވެ.
މެންބަރު ސައުދުﷲ ވިދާޅުވީ ބިދޭސީންނަށް އިހުމާލުވަނީ ކިހިނެއްތޯވެސް ބަލަންޖެހޭ ކަމަށެވެ. ބިލުގައި މުސާރަ ނުދިނުމަކީ އިހުމާލުވުން ކަމަށް ބަޔާން ކޮށްފައިވާއިރު، މަސައްކަތް ކުރުމުން ދައުލަތުގެ ތަންތަނުން އަދި އެހެންވެސް ފަރާތްތަކުން ދޭންޖެހޭ ފައިސާ ނުދޭނަމަ މުސާރަ ދޭނީ ކިހިނެއްތޯ ސައުދުﷲ ސުވާލު އުފެއްދެވިއެވެ.
"މިހާރު ވެސް ކުންފުނިތަކުގައި އެބަތިބި ގާތްގަނޑަކަށް ހަތަރު ފަސް މަސް ވަންދެން މުސާރަ ނުދެފިވައި ތިބި މީހުން. އެކަން ހައްލު ކުރެވޭނީ އަޅުގަނޑު ދަންނަވާނީ، މަސައްކަތްކޮށްފައި ދޭންޖެހޭ ފަރާތްތަކުން އެ އަގު އަދާކޮށްގެން." ސައުދުﷲ ވިދާޅުވިއެވެ.
މީގެއިތުރުން ސައުދުﷲ ވިދާޅުވީ ފިލައިގެން އުޅޭ ބިދޭސީންނާ މެދު މިހާރު އަޅާ ފިޔަވަޅަކީ އެ މީހުން ޑީޕޯޓްކުރުން ކަމަށާއި އެކަމުން އެ ބިދޭސީންނަށް އެއްވެސް ގެއްލުމެއް ނޯންނަ ކަމަށެވެ. ސައުދުﷲ މިސާލެއްގެ ގޮތުން ވިދާޅުވީ ކޮންސްޓްރަކްޝަން ދާއިރާއިން 350 ޑޮލަރު ދޭ ބޭރުމީހުން ފިލައިގެން ގޮސް މަސް ދޯންޏަކަށް އެރުމުން މަހަކު 1000 އަދި 2000 ޑޮލަރު ލިބޭ ކަމަށެވެ. އެހެންކަމުން އެމީހުން ފިލަން ނުޖެހޭ ސަބަބެއް ނެތް ކަމަށާއި ފިލުމުން އެމީހުންނަށް ލިބޭނެ އަދަބެއްވެސް ނެތްކަން ފާހަގަ ކުރެއްވިއެވެ. އެގޮތަށް ބިދޭސީން އުޅުމަށްފަހު ފުރައިގެން ދާންވުމުން އެމީހުން ޑީޕޯޓް ކޮށްލުމަކީ އެމީހުނަށް ލިބޭ ގެއްލުމެއް ނޫންކަމަށާއި، އެހެންނަމަވެސް އެ މީހާ ގެނައި މީހާ އާއި ދިވެހި ދައުލަތަށް އެކަމުން ގެއްލުންވާ ކަމަށެވެ.