ފެނަކަގެ ބިލްތައް މެސެޖަކުން ފޮނުވަން ފެށުމުން ކަރުދާހަށް ކުރަން ޖެހޭ ހަރަދު ވަރަށް ބޮޑަށް ސަލާމަތް ކުރެވިފައިވާ ކަމަށް އެ ކުންފުނިން ބުނެފި އެވެ.
ފެނަކަ އިން މިއަދު ބުނީ މިދިޔަ މަހުން ފެށިގެން ބިލްތައް އެސްއެމްއެސް މެދުވެރިކޮށް ކަސްޓަމަރުންނަށް ފޮނުވަން ފެށުމުން ބިލް ޕްރިންޓް ކުރުމަށް މަހަކު ދާ ޙަރަދުން 104،000ރ .އަދި ރެޑް ނޯޓިސް ބިލަށްދާ ޙަރަދުން 10،000ރ. ސަލާމަތް ކުރެވިގެން ދާ ކަމަށެވެ.
އެހެންވެ މިހާރު މަހެއްގެ މައްޗަށް 114،000ރ. ސަލާމަތް ކުރެވޭ އިރު އިދާރީ ކަންކަމަށް ދާ ޙަރަދުތަކުން ވެސް ބޮޑުބައެއް ސަލާމަތް ކުރެވިގެން ދާނެ ކަމަށް ފެނަކައިން ބުންޏެވެ.
އެ ކުންފުނިން އެސްއެމްއެސް މެދުވެރިކޮށް ފޮނުވާ ބިލުގައި ބިލް ނަންބަރާއި ބިލިން އެޑްރެހާއި މީޓަރު ނަންބަރާއި ސަބްސްކްރިޕްޝަން ނަންބަރުގެ އިތުރުން ބިލުގައިވާ ފައިސާގެ އަދަދު އަދި މުއްދަތު ހަމަވާ ތާރީޚު ވެސް ހިމެނެ އެވެ.
ފެނަކަ އިން ބުނީ މިފަދަ ބަދަލެއް ގެންނަން ނިންމި މުހިއްމު އެއް ސަބަބަކީ ހަރަދުތައް ކުޑަކުރުމާ އެކީ ކަސްޓަމަރުންނަށް ލުއި ފަސޭހަ ގޮތްތަކެއް ހޯދައި ދިނުން ކަމަށެވެ.