އަތަމާ އަބްދުއްލަތީފް ހުސެއިން މަނިކު މިއަދު އަވަހާރަވެއްޖެ އެވެ.
އޭނަ އަވަހާރަވީ އޭޑީކޭ ހޮސްޕިޓަލުގައި ފަރުވާ ދެމުން ދަނިކޮށެވެ. އަވަހާރަވި އިރު އުމުރަކީ 94 އެވެ.
އަތަމާ އަބްދުއްލަތީފަކީ ގިނަ ދުވަސްތަކެއް ވަންދެން މީހުން ހައްޖަށް ގެންދަން "އަތަމާ ގްރޫޕް" ގެ ނަމުގައި ކުންފުންޏެއް ހިންގެވި ބޭފުޅެކެވެ. މީގެ އިތުރުން ވެސް އޭނަ އަކީ އެކި ދާއިރާގެ ވިޔަފާރިތައް ކުރެއްވި ވިޔަފާވެރިއެކެވެ.
އަބްދުއްލަތީފަކީ މާލެ އާއި އަތޮޅުތެރޭގެ ބައެއް ރަށްރަށުގައި މިސްކިތްތަކެއް ވެސް ބިނާކޮށް ދެއްވި ބޭފުޅެކެވެ.
އޭނާގެ ހިދުމަތުގެ އަގު ވަޒަންކޮށް ސަރުކާރުން 1991 ގައި ގައުމީ އިނާމް ދީފައިވެ އެވެ.
އަތަމާ ލަތީފު އަވަހާރަވުމާ ގުޅިގެން ރައީސް ޑރ. މުހައްމަދު މުއިއްޒު ވެސް އޭނަގެ ހިދުމަތްތައް ފާހަގަކުރައްވައި އާއިލާ އަށް ތައުޒިޔާ ފޮނުއްވާފައިވެ އެވެ.