ސްރީ ލަންކަން އެއާލައިންސް އިން އައްޑު އަށް ކުރާ ދަތުރުތަކުގެ އަދަދު 3 އަށް އިތުރު ކުރަން ނިންމާފައިވާ ކަމަށް އެ އެއާލައިންގެ ރާއްޖޭގެ އެޖެންޓް، އޭސް ޓްރެވެލްސް އިން ބުނެފި އެވެ.
އެ ކުންފުނީގެ ވެރިޔާ މުހައްމަދު ފިރާގު އިނަ މޯލްޑިވްސް (ފިރާގު) ސޯޝަލް މީޑިއާ ޕޯސްޓެއްގައި ވިދާޅުވީ ގަމަށް ހަފުތާއަކު ކުރާ ދަތުރުތަކުގެ އަދަދު ތިނެކަށް އިތުރު ކުރާނީ އަންނަ އޮކްޓޯބަރު މަހުގެ 31 އިން ފެށިގެން ކަމަށެވެ. އެއާ އެކީ ގަމަށް ދަތުރު ކުރާނީ ހޮނިހިރާއި އަންގާރަ އަދި ބުރާސްފަތީގައި ކަމަށް އޭނަ ވިދާޅުވި އެވެ.
ފިރާގު ވިދާޅުވީ ގަމަށް ކުރާ ދަތުރުތައް އިތުރު ކުރަން ނިންމީ ދެކުނު އަތޮޅުތަކުގެ ޓޫރިސްޓް ފެސިލީތަކަށް އަންނަން ޓޫރިސްޓުންނަށް ފަސޭހަކޮށް ދިނުމުގެ ގޮތުން ކަމަށެވެ. އެހެންވެ މި ދަތުރުތައް ދެމެހެއްޓެނިވި ގޮތެއްގައި ކުރިއަށް ގެންދަން ޓޫރިޒަމްގެ ދާއިރާގެ އެހީތެރިކަމާއި އެއްބާރުލުން ވަރަށް ބޮޑަށް ބޭނުންވާ ކަމަށް އޭނަ ވިދާޅުވެ އެވެ.
ގަމަށް ސްރީ ލަންކަންގެ ދަތުރުތައް ފެށީ 2016 ގަ އެވެ.
މީގެ ސަބަބުން ދެކުނުގެ ވިޔަފާވެރިންނަށާއި އާންމުންނަށް ވެސް ބޭރަށް ދަތުރު ކުރަން ލުއިތަކެއް ލިބިފައިވެ އެވެ.