އެމްއެމްޕީއާރްސީގެ މައްސަލަ ބަލަން ރައީސް ޑރ. މުހައްމަދު މުއިއްޒަށް ކެރިވަޑައިނުގަންނަވާނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީއެންއެފްގެ ފްރޮންޓް އޮފީސް ޖަލްސާގައި ރޭ ވާހަކަދައްކަމުން ޔާމީން ވިދާޅުވީ އެމްއެމްޕީއާރްސީގެ މައްސަލާގައި ކުރީގެ ނައިބު ރައީސް އަހުމަދު އަދީބުގެ ފަރާތުން ލިބިފައިވާ މައުލޫމާތުތަކާއި ލިސްޓެއް ފުލުސް އޮފީހުގައި އޮންނާނެ ކަމަށާއި އެމްއެމްޕީއާރްސީގެ މައްސަލައާ ގުޅޭ ޝަރީއަތްތައް ލައިވް ކުރާއިރު، އެ ލިސްޓު ފޮރުވައިގެން ހާމަނުކޮށް އުޅޭ ސަބަބާއި މެދު ސުވާލު އުފެދޭ ކަމަށެވެ.
ނަމަވެސް ސަރުކާރުގެ ސުޕާ މެޖޯރިޓީ ރައްޔިތުންގެ މަޖިލީހުގައި އޮވެގެން އަދި މަޖިލީހުގެ ރައީސް އަބްދުއްރަހީމް އަބްދުﷲ މެންފަދަ ބޭފުޅުންގެ ނަން އެ ލިސްޓުގައި ތިބުމުން އެ މައްސަލަ ބަލަން ފުލުހުންނަށް ވެސް ނުކެރޭނެ ކަމަށް ޔާމީން ވިދާޅުވި އެވެ.
"ގާނޫނު އަސާސީން މިކަން މަތިކޮށްފައިވަނީ އޭސީސީއަށް. ދެން އޮތީ ޖިނާއީ ބައި އަންނަކަމުގައިވާނަމަ އެދަނީ ފުލުހުންނަށް. މި ދެ މުއައްސަސާއަކުން ކުރެ މުއައްސަސާއަކަށް މިކަމެއް ނުކުރެވޭނެ. ދެން ރައީސުލްޖުމްހޫރިއްޔާ އެ ވިދާޅުވާ ގޮތަށް، އެއްވެސް ބަޔަކަށް ނުކުރެވޭ މިންވަރަށް މިކަން ކުރާނެކަމުގެ ހިތްވަރު ހުރިކަމުގައިވާނަމަ އަޅުގަނޑު ރައިސުލްޖުމްހޫރިއްޔާއަށް ޗެލެންޖްކޮށްފައި ދަންނަވާ ވާހަކައެއް މިއީ، ރައީސުލްޖުމްހުރިއްޔާ އަށް ގާނޫނީ ގޮތުން ބާރުލިބޭ މި މުއައްސަސާތަކަށް ނުފޫޒެއް ނެތި މި މައްސަލަ ނުބެލޭކަމުގައިވާނަމަ ރައީސުލްޖުމްހުރިއްޔާ އެކުލަވާލައްވަންވީ ނޫންތޯ މިކަމަށް ކޮމިޝަނެއް،" ޔާމީން ވިދާޅުވި އެވެ.
ޔާމީން ވިދާޅުވީ ރައީސް މުއިއްޒުގެ އަރިހުގައި ތިބި ބޮޑުންގެ ތެރޭގައި މިހާރު ވެސް ތިއްބެވީ ކޮރަޕްޝަނުގެ އަމަލުތައް ހިންގާފައިވާ ބޭފުޅުން ކަމަށެވެ.
"މިހާރުގެ އެހުރި ފޮރިން މިނިސްޓަރު މޫސާ ޒަމީރުގެ އަންހެނުންގެ ދޮންބައްޕަ ނަމުގައި ނަގާފައި ލިކިއުޓޭޑްކޮށްފައި ހުރިހާ ފައިސާއެއް އެހުރީ އޭނާގެ އެކައުންޓުގައި. ދެން ކޮން ވާހަކައެއްތޯ މި ދައްކަވަނީ ދުވަހަކުވެސް މީހަކަށް ކޮރަޕްޝަން ނުބޭލޭ ވަރަށް ބަލާނަމޭ. ރައްޔިތުންގެ މަޖިލީހުގެ ރައީސް އަބްދުއްރަހީމްގެ ވާހަކަ ތި ވިދާޅުވީ އޮއިއްޓޭގެ ބަޔާނުގައި އޮތް ވާހަކަ. ކިހިނެއްތޯ މިކަހަލަ ކަންތައްތައް ބަލާނީ މުއިއްޒު. މުއިއްޒަކަށް ނުބެލޭނެ މިކަންކަމެއް،" ޔާމީން ވިދާޅުވި އެވެ.
މީގެއިތުރުން ޔާމީން ވަނީ އެމްއެމްޕީއާރްސީގެ މައްސަލައިގެ އިތުރަށް ރައީސް މުއިއްޒު މާލެ ސިޓީ ކައުންސިލްގައި އުޅުއްވި އިރު ކޮރަޕްޝަނަށް މަގުފަހިވާގޮތަށް ކުރައްވާފައިވާ ކަންކަން ވެސް ބަލަން ފުރުސަތު ނުދެއްވާނެ ކަމަށްވެސް ވިދާޅުވެފަ އެވެ.