އައްޑޫގެ ޓޫރިޒަމް ޕްރޮޑަކްޓް ބްރޭންޑްކުރަން ބަޔަކާ ހަވާލުކޮށްފި އެވެ.
ކައުންސިލުން އެ މަސައްކަތް އިއްޔެ ހަވާލުކުރީ ކްރިއޭޓިވް ކްރޫ ކިޔާ ކުންފުންޏަކާ އެވެ.
އެގޮތުން އެ ކުންފުންޏާ ހަވާލުކޮށްފައި ވަނީ އައްޑޫގެ ޓޫރިޒަމް ޕްރޮޑަކްޓް ބްރޭންޑް ކުރުމާއި ޕޮޒިޝަންކުރާނެ ގޮތުގެ ޕްލޭން ތައްޔާރު ކުރަން ކަމަށް ކައުންސިލުން ބުންޏެވެ.
ކައުންސިލުން ބުނީ މި މަސައްކަތް ކުރާނެ ބަޔަކު ހޯދަން ބީލަމަށް ހުޅުވައިލުމުން ކްރިއޭޓިވް ކްރޫ އިން ކުރިމަތިލީ އެންކްރިއާ ޕްރައިވެޓް ލިމިޓެޑާ އެކީ ވެފަައިވާ ޕާޓްނަޝިޕެއްގެ ދަށުން ކަމަށެވެ.
އެތުން އައްޑޫގެ ޓޫރިޒަމް ޕްރޮޑަކްޓް ބްރޭންޑްކުރަން ކުރިއަށް ގެންދާ ޕްރޮޖެކްޓްގެ ދަށުން އައްޑޫގެ ޓޫރިޒަމް ޑެސްޓިނޭޝަން މާކެޓްކުރުމަށް ބޭނުންވާ މެޓީރިއަލްސް ވެސް ޑިޒައިންކޮށް ތައްޔާރު ކުރާނެ އެވެ.
އައްޑޫ ޓޫރިޒަމް ޕްރޮޑަކްޓް ބްރޭންޑްކުރަން ބަޔަކާ ހަވާލުކުރި، އައްޑޫގެ ޓޫރިޒަމްގެ ތަފާތު މަޝްރޫއުތައް ހިންގަން ރޭވިފައި އެބަހުއްޓެވެ. އޭގެ ތެރޭގައި އައްޑޫގެ ޓޫރިޒަމް ޒޯންތައް ތަރައްގީ ކުރުމާއި އިންޓަގްރޭޓެޑް ޓޫރިޒަމަށް ހަންކެޑެ ތަރައްގީ ކުރުމާއި ޓޫރިޒަމަށް ހާއްސަކޮށްގެން ރަށްތައް ހިއްކާފައިވުމާއި އައްސޭރި ޓޫރިޒަމް މަޝްރޫއެއް ކުރިއަށް ގެންދިއުން ހިމެނެ އެވެ.
އައްޑޫގައި މި ވަގުތު ތިން ރިސޯޓެއް އޮޕަރޭޓް ކުރެ އެވެ. އެއީ ކެނަރީފާއި ސައުތު ޕާމް ރިސޯޓާއި ގަމުގެ އީކްއޭޓަ ވިޖެވެ. އައްޑޫގެ ރިސޯޓްތަކުގެ ތެރެއިން ޝަންގްރިއްލާ ވިލިގިލި ރިސޯޓް އެންޑް ސްޕާ ބަންދުކޮށްފައި އޮންނަތާ ހަތަރު އަހަރެއްހާ ދުވަސްވެފައިވާ އިރު، މި އަހަރުގެ ޑިސެމްބަރުގައި އެތަން އަލުން ހުޅުވޭތޯ މަސައްކަތް ކުރަމުން އަންނަ ކަމަށް ސަރުކާރުން ބުނެފައިވެ އެވެ.
އައްޑު އަކީ ގެސްޓް ހައުސްގެ ވިޔަފާރި ވެސް ހިންގަމުން އަންނަ ތަނެކެވެ.